АҚШ ва Эрон ўртасидаги тинчликнинг узоқ муддатли истиқболлари ҳали ҳам ноаниқ бўлиб қолмоқда. Бироқ дастлабки келишув дунё нефть ва газ таъминотининг қарийб бешдан бир қисми ўтадиган Ҳурмуз бўғози орқали ҳаракатни қайта тиклаш имконини берди.

Сешанба куни нефть нархлари уруш бошланган 28 февралдан буён энг паст даражага тушди.

БМТнинг денгизчилик агентлиги эса Эрон бўғозни ёпган вақтда ҳудудда қолиб кетган 11 минг нафар денгизчини эвакуация қилиш устида ишлаётганини маълум қилди.

Келишувга мувофиқ, Эрон 60 кун давомида бўғоз орқали эркин ҳаракатни таъминлаши керак. Бироқ Теҳрон бу муддат тугагач, кемалардан йиғим ёки бошқа тўловлар олиниши мумкинлигини билдирган.

Эрон ва Уммон сешанба куни қўшма баёнот бериб, Ҳурмуз бўғозидаги «суверен ҳуқуқлари»ни таъкидлади ҳамда ҳаракатни бошқариш ва унга боғлиқ харажатларни мувофиқлаштириш бўйича ҳамкорлик қилишини маълум қилди.

АҚШ давлат котиби Марко Рубио эса Форс кўрфазидаги иттифоқчилар билан учрашувлар чоғида Эронга Ҳурмуз бўғозида транзит учун тўлов жорий этишга рухсат берилмаслигини айтди.

Кузатувчилар фикрича, Вашингтон ва Теҳрон ўртасидаги келишувнинг муваффақияти айнан ушбу баҳсли масалалар бўйича қандай ечим топилишига боғлиқ бўлади.