Пайшанба куни Эрон Ҳурмуз бўғози устидан назоратини кучайтирганини намойиш этди. Давлат телевидениеси тарқатган видеода тезкор қайиқда ҳаракатланган махсус кучлар йирик юк кемасига бостириб киргани акс этган.

АҚШ президенти Дональд Трамп Эроннинг кичик ҳарбий кемалари таҳдидини жиддий деб ҳисобламаслигини айтди. Унинг таъкидлашича, Теҳрон келишувга эришишни истайди, аммо мамлакат раҳбариятида беқарорлик бор. Шу билан бирга, Трамп Эрон музокарага рози бўлмаса, масала ҳарбий йўл билан ҳал қилинишини билдирди.

Эрон давлат телевидениеси намойиш этган кадрларда ниқобли ҳарбийлар MSC Francesca юк кемасига яқинлашиб, арғамчи нарвонда бортга чиққанини кўриш мумкин. Видеода яна бир кема, Epaminondas ҳам акс этган. Эрон икки кема чоршанба куни рухсатсиз Ҳормуз бўғозидан ўтишга урингани учун қўлга олинганини маълум қилди.

Бу воқеа АҚШнинг ҳарбий устунлигига қарамай, Ҳурмуз бўғозида вазиятни тўлиқ назорат қилиш қийинлигини яна бир бор кўрсатди. Урушдан олдин дунё нефти ва суюлтирилган табиий газининг қарийб бешдан бир қисми айнан шу бўғоз орқали ташилган.

Пайшанба оқшомида Теҳроннинг айрим ҳудудларида ҳаво мудофаа тизимлари “душман нишонлари”га қарши ишга тушгани хабар қилинди. Бу хабар ортидан нефть нархлари кескин ошди, АҚШ фонд бозорларида эса пасайиш кузатилди.

Кейинроқ Эроннинг Fars агентлиги Теҳрон ва бир неча бошқа шаҳарларда кичик дронлар ва микро учувчисиз аппаратларга қарши мудофаа тизимлари ишга тушганини маълум қилди. Дронларни ким учиргани ҳозирча номаълум.

АҚШ ва Исроил томонидан 28 февралда бошланган уруш 8 апрелдаги сулҳдан кейин тўхтатилган эди. Бироқ Исроил мудофаа вазири Исраэль Кац мамлакат ҳужумларни қайта бошлашга тайёр эканини билдирди. Унинг айтишича, Исроил АҚШдан “яшил чироқ” кутмоқда.

Кац эҳтимолий янги ҳужумлар “бошқача ва ҳалокатли” бўлишини, Эроннинг энг муҳим нуқталари нишонга олинишини таъкидлади.