Эроннинг марҳум олий раҳбари Оятуллоҳ Али Хоманаийнинг уч ўғли якшанба куни Теҳронда отаси ва оиланинг бошқа тўрт аъзоси тобути ёнида жаноза намозида иштирок этди. Аммо Хоманаийнинг вориси сифатида олий раҳбарликка келган ўғли Мужтабо Хоманаий маросимда кўринмади, деб хабар берди Reuters.

Эрон давлат телевидениеси Мустафо, Майсам ва Масъуд Хоманаий Теҳрондаги Имом Хумайний номидаги катта мусалло ҳовлисида қўйилган тобутлар ортида намоз ўқиётганини намойиш қилди.

Reuters маълумотига кўра, Али Хоманаий ва унинг оиласининг бир неча аъзоси 28 февраль куни АҚШ ва Исроил Эронга қарши ҳарбий амалиёт бошлаган пайтда ҳаво зарбаси оқибатида ҳалок бўлган.

Бир неча ҳафта давом этган урушдан кейин томонлар заиф сулҳга эришган. Можаро минтақада катта қурбонлар ва вайронагарчиликларга сабаб бўлган, аммо Эрондаги диний ҳукумат, Ислом инқилоби қўриқчилари корпуси кўмагида, ҳокимиятда қолган.

Эрон ҳукумати Хоманаий хотирасига бир ҳафта давом этадиган оммавий дафн маросимлари ташкил қилмоқда. Маросимлар нафақат Эронда, балки қўшни Ироқдаги шиа муқаддас шаҳарларида ҳам ўтказилиши режалаштирилган.

Шанба куни Хоманаийнинг тобути, шунингдек, унинг қизи, куёви, келини ва 14 ойлик неварасининг тобутлари шиша остида жамоатчиликка намойиш этилган. Якшанба куни эса ўн минглаб мотамсаро, жумладан ҳарбийлар, диний талабалар ва оддий фуқаролар мусаллога келиб, марҳумларга ҳурмат бажо келтирган.

Маросимда иштирок этган айримлар АҚШ ва Исроилга қарши қасос шиорлари туширилган байроқларни кўтариб турган. Бошқалар Эроннинг биринчи олий раҳбари Оятуллоҳ Руҳуллоҳ Хумайний номи билан аталган мажмуада биргаликда дуо қилган.

Reuters’га кўра, 28 февралдаги зарбадан кейин Мужтабо Хоманаий ҳалигача омма олдида кўриниш бергани йўқ ва унинг янги сурати ҳам эълон қилинмади. Манбаларга кўра, у отаси ва оила аъзолари ҳалок бўлган ҳужумда жароҳатланган. Яқин доиралар Мужтабонинг юзи жароҳатлангани ва бир ёки икки оёғидан жиддий шикаст олганини билдирган.

Маросимда қатнашган ёш аёллардан бири ярим расмий Tasnim агентлигига берган интервьюсида Мужтабо Хоманаийнинг жаноза маросимига келишини охирги дақиқаларгача умид қилганини айтган.

Эрон президенти Масъуд Пезешкиён, парламент спикери Муҳаммад Боқир Қолибоф ва бош судья Ғуломҳусайн Муҳсиний Эжеий ҳам якшанба куни тобутлар ортида жаноза намозида иштирок этди. Масъуд Хоманаий намоз пайтида кўз ёшини кафия билан артиб тургани кўринган.

Reuters маълумотига кўра, Теҳрон марказига катта оломон оқиб келмоқда. Эрон метрополитени шанба кечасидан якшанба тонгигача 7 миллион йўловчи қатновини қайд этганини билдирган.

Душанба куни Теҳрон марказида йирик мотам юриши ўтказилиши кутилмоқда. Сешанба куни Хоманаийнинг жасади Эрондаги шиа диний маркази ҳисобланган Қум шаҳрига олиб борилади.

Чоршанба куни тобут Ироққа – Нажаф ва Карбало шаҳарларидаги шиа муқаддас масканларида ўтказиладиган маросимлар учун олиб борилади. Пайшанба куни эса жасад Эронга қайтарилиб, Машҳадда яна бир мотам юриши ўтказилади ва Хоманаий ўрта аср шиа имомларидан бири мақбараси яқинида дафн этилади.

Эрон расмийлари келгуси кунлардаги маросимларга миллионлаб одамларни жалб қилишни режалаштирмоқда. Ҳукумат иштирокчилар учун транспорт, озиқ-овқат ва турар жой ташкил этилишини маълум қилган.