Германиянинг Франкфурт Майн аэропортида безгак юқтирган икки нафар ходим вафот этди. Жами олти нафар аэропорт ходимида инфекция аниқланган

Мутахассислар таъкидлашича, инфекция июль ойида самолётнинг юкхонаси орқали Германияга кириб келган бўлиши мумкин. Касаллик Anopheles чивини чақиши оқибатида тарқалмоқда. Бу ҳолат «аэропорт безгаги» деб аталади ва жуда кам учрайди.

Аэропортда махсус чивин тутқичлар ўрнатилиб, тутилган ҳашаротлар лабораторияга юборилди. Қолган беморларга тиббий ёрдам кўрсатилмоқда. Безгак одамдан одамга оддий мулоқот орқали юқмайди; асосий юқиш йўли – зарарланган чивин чақиши. Мутахассислар йўловчилар учун хавф жуда паст эканини таъкидламоқда.