АҚШ Марказий разведка бошқармаси – ЦРУ ва Исроилнинг “Моссад” разведка хизмати Эроннинг янги олий раҳбари Мужтабо Хоманаийнинг қаерда эканини аниқлаш учун махфий курьерлар ва унинг яқин атрофидаги шахсларни ўрганмоқда. Бу ҳақда The Times разведка ва хавфсизлик соҳасидаги манбаларига таяниб хабар берди.

Мужтабо Хоманаий 28 февралдан буён жамоатчилик олдида кўринмаган. Ўша куни АҚШ ва Исроилнинг ҳаво зарбалари натижасида унинг отаси, Эронни 37 йил бошқарган олий раҳбар Али Хоманаий ҳалок бўлди. Мужтабо ҳам ҳужумда оғир жароҳатланган – Reuters манбалари унинг юзи шикастлангани ва оёқ-қўллари жиддий жароҳатланганини хабар қилган.

Эрон Экспертлар кенгаши 8 март куни 56 ёшли Мужтабо Хоманаийни мамлакатнинг учинчи олий раҳбари этиб сайлади. Бироқ у тайинланганидан кейин на омма олдида чиқиш қилди, на нутқ сўзлади ва на интервью берди. Унинг номидан бир нечта ёзма баёнот эълон қилинган, холос.

Reuters маълумотига кўра, ҳужумдан кейин Мужтабо Хоманаийнинг тасдиқланган янги сурати, видеоси ёки овозли ёзуви тарқатилмаган. Эрон расмийлари унинг давлат қарорларини қабул қилишда иштирок этаётганини ва соғлиғи тикланаётганини билдирган. Президент Масъуд Пезешкиён май ойида олий раҳбар билан учрашганини айтган, аммо учрашувга оид тасвирлар эълон қилинмаган.

The Times манбаларига кўра, Хоманаий электрон қурилмалардан фойдаланмаётгани сабабли сунъий йўлдош, телефон ва интернет сигналларини кузатиш кутилган натижани бермаган. Шу боис ЦРУ ва “Моссад” асосий эътиборни инсон манбалари орқали разведкага – HUMINT усулига қаратган.

Разведка хизматлари Хоманаий билан юқори мартабали амалдорлар ўртасида қўлда ёзилган хабарларни ташувчи курьерларни аниқлашга ва унинг яқин доирасидаги шахслардан маълумот олишга уринаётгани айтилмоқда. Собиқ “Моссад” амалдори Рами Играга кўра, хабарлар бир неча воситачи орқали узатилаётган бўлиши мумкин ва бу занжирдаги инсон манбалари Хоманаийни топишнинг энг самарали йўли бўлиб қолмоқда.

Айрим тахминларга кўра, Эрон раҳбари Теҳрон ёки Қум яқинидаги муҳофазаланган ерости иншоотида даволанмоқда. Шунингдек, унинг жойи тез-тез алмаштирилиши ёки қиёфадошлардан фойдаланилаётгани ҳақида фаразлар мавжуд. Бироқ бу маълумотлар расман ёки мустақил манбалар томонидан тасдиқланган эмас.

The Times ёзишича, ҳозирги разведка ҳаракатларининг бевосита вазифаси – Мужтабо Хоманаийнинг тириклигини ва қаерда эканини аниқлаш. Уни ўлдириш бўйича қарор қабул қилингани ёки бу орқали Эронни музокарага мажбурлаш режаси мавжудлиги ҳақида ишончли далил эълон қилинмаган.