Эрон АҚШ билан урушни тугатиш ва музокараларга қайтиш учун ўзининг сўнгги шартларини Вашингтонга Қатар воситачилигида етказди. Бу ҳақда Эрон Олий миллий хавфсизлик кенгаши котиби Моҳсен Ризоий Al Jazeera телеканалига берган интервьюсида маълум қилди.

Теҳрон талаблари орасида барча фронтларда, хусусан Ливанда урушни тўхтатиш, Эроннинг музлатилган миллиардлаб долларлик маблағларини озод қилиш, Эрон портларига нисбатан денгиз блокадасини бекор қилиш, АҚШнинг мамлакат ички ишларига аралашувини тўхтатиш, Эрон ҳукуматига қарши кучлар билан ҳамкорликни тўхтатиш ҳамда Эрон ҳудудига барча Америка ҳужумларини тўхтатиш бор.

Ризоийнинг таъкидлашича, Теҳрон Вашингтондан ушбу шартларни қабул қилиб, амалга оширишини кутмоқда. Айни пайтда АҚШ томони Эроннинг янги талабларига расман жавоб бермаган. Эрон парламенти спикери Муҳаммад Боқир Қолибоф эса шартлар бажарилмагунча Ҳурмуз бўғозини аввалги тартибда очиш ва музокараларга қайтиш учун асос бўлмаслигини билдирди.

Вазият Ямандаги тўқнашувларнинг кучайиши ва муҳим денгиз йўлларидаги узилишлар фонида янада мураккаблашмоқда. Ҳурмуз бўғозидаги вазият ҳамда Қизил денгиз йўналишидаги муаммолар жаҳон энергетика бозорига босим ўтказиб, нефть нархининг бир баррель учун 100 доллардан ошишига олиб келди.