Эрон чоршанба куни АҚШнинг тинчлик таклифини ўрганаётганини маълум қилди. Манбаларга кўра, таклиф урушни расман якунлашни назарда тутади, аммо Вашингтоннинг асосий талаблари, яъни Эрон ядровий дастурини тўхтатиши ва Ҳурмуз бўғозини қайта очиши масалалари ҳали ҳал этилмаган.

Эрон ташқи ишлар вазирлиги вакили ISNA агентлигига Теҳрон ўз жавобини маълум қилишини айтди. АҚШ президенти Доналд Трамп эса Эрон келишувга эришишни хоҳлаётганига ишонишини билдирди.

“Улар келишув тузишни истаяпти. Сўнгги 24 соатда жуда яхши музокаралар ўтказдик ва келишувга эришишимиз эҳтимоли юқори”, деди Трамп Оқ уйда журналистларга.

Бироқ шу куннинг ўзида Трамп келишув имкониятларига нисбатан анча эҳтиёткор оҳангда гапирганди. У Truth Social тармоғидаги постида, агар Теҳрон АҚШнинг сўнгги таклифига рози бўлмаса, Эрондаги бомбардимонлар қайта бошланиши мумкинлигини айтди.

Манбаларга кўра, бир саҳифалик меморандум бўйича келишув яқин. У можарони расман тугатиши, кейин эса Ҳурмуз бўғози орқали юк ташишни тиклаш, АҚШ санкцияларини бекор қилиш ва Эрон ядровий дастурига чекловлар белгилаш бўйича музокараларга йўл очиши мумкин.

Эроннинг ярим расмий Tasnim агентлиги эса АҚШ таклифида “қабул қилиб бўлмайдиган бандлар” борлигини, аммо улар нимадан иборат эканини очиқламаганини хабар қилди.

Эрон парламентининг ташқи сиёсат ва миллий хавфсизлик қўмитаси вакили Иброҳим Ризоий ҳужжатни “реал таклифдан кўра кўпроқ Америка истаклари рўйхати” деб атади.

“Америкаликлар ютқазаётган урушда юзма-юз музокараларда қўлга киритмаган нарсани қўлга кирита олмайди”, деб ёзди у ижтимоий тармоқда.