Буюк Британия Чагос архипелаги суверенитетини Маврикийга топшириш бўйича келишув шартларини қайта кўриб чиқади. Бу ҳақда мамлакат мудофаа вазири Уэс Стритинг маълум қилди.

Қарор АҚШ президенти Дональд Трамп келишувнинг ҳозирги шаклини яна бир бор кескин танқид қилиб, уни «даҳшатли келишув» деб атаганидан сўнг эълон қилинди. Трамп бу фикрни Нью-Йоркда БМТ Бош Ассамблеяси доирасида Буюк Британия бош вазири Энди Бернем билан учрашувида билдирган.

Стритингнинг айтишича, Трампнинг сўнгги баёноти Вашингтоннинг позицияси ўзгармаганини аниқ кўрсатган. Шу сабаб Лондон АҚШ маъмурияти билан музокараларни давом эттириб, келишувни Вашингтон ҳам қўллаб-қувватлай оладиган шаклга келтиришга ҳаракат қилади.

«Биз америкалик иттифоқчиларимиз, президент Трамп ва унинг маъмурияти билан яна ишлашимиз керак», — деди Британия мудофаа вазири BBCга берган интервьюсида.

Амалдаги келишувга кўра, Буюк Британия Чагос ороллари устидан суверенитетни Маврикийга топшириши, аммо стратегик аҳамиятга эга Диего-Гарсия атоллини 99 йилга ижарага олиб қолиши кўзда тутилган. Бу ерда АҚШ ва Буюк Британиянинг қўшма ҳарбий базаси жойлашган.

Диего-Гарсия Ҳинд океанидаги муҳим ҳарбий-стратегик нуқталардан бири ҳисобланади. Британия ҳукумати келишувни қайта кўриб чиқишда базанинг узоқ муддатли фаолияти ва АҚШ билан ҳарбий ҳамкорлик кафолатланишини асосий вазифа сифатида кўрсатмоқда. Стритинг келишув АҚШ розилигисиз амалга ошмаслигини очиқ айтди.

Айни пайтда Маврикийга тўланиши кўзда тутилган маблағлар ҳам тўхтатиб турилган. Британия ҳукумати томонлар — Лондон, Вашингтон ва Маврикий — қабул қила оладиган янги шартларни ишлаб чиқишга ҳаракат қилмоқда.