Microsoft асосчиси Билл Гейтс сунъий интеллект технологиялари нотўғри мақсадларда қўлланилса, инсоният учун улкан хавф туғдириши мумкинлигидан огоҳлантирди.

NBC News’га берган интервьюсида Гейтс сунъий интеллект имкониятлари ниҳоятда кучайиб бораётганини таъкидлади.

«Сунъий интеллект бир миллиард одамнинг ҳалок бўлишига олиб келиши мумкин бўлган воқеаларни келтириб чиқариш учун етарлича кучли. Ёвуз ниятли инсонлар ва энг янги сунъий интеллект воситаларининг бирлашувидек қудратли қурол илгари бўлмаган», — деди у.

Гейтснинг фикрича, сунъий интеллект компанияларининг ўзини ўзи назорат қилиши технология хавфсизлигини таъминлаш учун етарли эмас.

У ҳуқуқни муҳофаза қилувчи органлар ва сиёсатчилар ҳам жараёнга қўшилиб, сунъий интеллектдан фойдаланишда қандай хавфсизлик чоралари ва назорат механизмлари жорий этилишини муҳокама қилиши зарурлигини таъкидлади.

Гейтснинг баёноти сунъий интеллект имкониятлари жадал кенгайиб бораётган бир пайтда уни назорат қилиш ва хавфсиз ривожлантириш масаласи қанчалик долзарб эканини яна бир бор кун тартибига олиб чиқди.