Беларус суди машҳур рок мусиқачиси, «Ляпис Трубецкой» ва Brutto гуруҳлари етакчиси Сергей Михалокни сиртдан тўрт йил муддатга озодликдан маҳрум қилиш ҳақида ҳукм чиқарди.

Минск шаҳар прокуратураси маълумотига кўра, мусиқачига нисбатан миллий, ирқий ёки ижтимоий адоватни қўзғатиш ҳамда Беларусь президенти Александр Лукашенкони ҳақорат қилиш айбловлари қўйилган. Суд уни ушбу айбловлар бўйича айбдор деб топди.

Сергей Михалок ҳозирда Беларусь ҳудудидан ташқарида яшайди. Шу сабабли суд жараёни унинг иштирокисиз, сиртдан ўтказилди.

Михалок 2020 йилда Беларусдаги президентлик сайловларидан кейин бошланган оммавий норозилик намойишларини қўллаб-қувватлаган санъаткорлардан бири ҳисобланади. У бир неча бор Александр Лукашенко сиёсатини очиқ танқид қилган ва шундан сўнг унга нисбатан жиноий таъқиб бошланди.

Сўнгги йилларда Беларусь ҳукумати мухолифат фаоллари, мустақил журналистлар, ҳуқуқ ҳимоячилари ва ҳукуматни танқид қилган санъаткорларга нисбатан жиноий ишлар қўзғатиб келмоқда. Халқаро ҳуқуқ ташкилотлари эса мамлакатда сўз эркинлиги ва сиёсий ҳуқуқлар билан боғлиқ вазият юзасидан мунтазам танқидлар билдиради.