Бирлашган Араб Амирликларидаги атом электр станцияси ҳудудига дрон ҳужуми уюштирилиб, ёнғин келиб чиққан. Бу ҳақда мамлакат расмийлари якшанба куни маълум қилди. Шу билан бир вақтда Саудия Арабистони ўз ҳудудига йўналтирилган учта дрон йўқ қилинганини билдирди. АҚШ президенти Дональд Трамп эса Эронни “тезда ҳаракат қилиш”га чақирди.

БАА ҳукуматининг маълум қилишича, ҳужум оқибатида “Барака” атом электр станциясининг ташқи қисмида жойлашган электр генератори зарарланган. Расмийларга кўра, радиация хавфсизлиги бузилмаган ва ҳеч ким жабрланмаган.

БАА мудофаа вазирлиги яна икки дрон зарарсизлантирилганини маълум қилди. Дронлар “ғарбий чегара” томондан учирилгани айтилган, аммо аниқ манба очиқланмаган.

Мамлакат президентининг дипломатик маслаҳатчиси ушбу ҳужумни “хавфли кескинлашув” деб баҳолаб, БАА бундай “террорчилик ҳаракатларига” жавоб қайтариш ҳуқуқига эга эканини таъкидлади.

Саудия Арабистони ҳам Ироқ ҳаво ҳудудидан кириб келган учта дрон тутиб қолинганини билдирди. Ар-Риёд ўз хавфсизлигига таҳдид бўлган ҳар қандай ҳаракатга қарши “зарур чоралар” кўрилишини маълум қилди.

Халқаро атом энергияси агентлиги станциянинг 3-блоки фавқулодда дизель генераторлари орқали электр билан таъминланаётганини билдирди. Агентлик атом объектлари атрофида “энг юқори даражада ҳарбий тийилиш”га чақирди.

Таҳлилчиларга кўра, февраль ойида АҚШ ва Исроилнинг Эронга қарши зарбалари билан бошланган можаро расман пасайган бўлса-да, Яқин Шарқда хавф ҳали ҳам юқори даражада сақланиб қолмоқда. Сўнгги ойларда Ироқ ҳудудидан Форс кўрфази давлатларига қарата бир неча бор дрон ҳужумлари амалга оширилган.

Эрон эса ҳозирча мазкур ҳодиса юзасидан расмий баёнот бермаган.