АҚШ Қуролли кучлари Марказий қўмондонлиги Эрондаги нишонларга қарши кучли зарбалар серияси бошланганини маълум қилди. Қўмондонликка кўра, ушбу ҳарбий ҳаракатлар халқаро сувларда савдо кемаларига қилинган ҳужумларга жавоб сифатида амалга оширилган.

Би-би-си хабарига кўра, АҚШ томони зарбалар Эроннинг Ҳурмуз бўғози орқали ҳаракатланаётган учта савдо кемасига ҳужум қилгани ортидан берилганини билдирган. Марказий қўмондонлик баёнотида Эрон томонидан намойиш этилган агрессия “асоссиз, хавфли ва ўт очишни тўхтатиш режимига очиқча зид” экани таъкидланган. Баёнот X ижтимоий тармоғида эълон қилинган.

Сешанба куни Ҳурмуз бўғозида икки танкер ҳужумга учрагани хабар қилинган эди. Қатар Эронни газ ташувчи танкерга дрон орқали ҳужум қилишда айблади. Ҳужум натижасида кеманинг машина бўлимида ёнғин чиққан, экипаж эса эвакуация қилинган. Reuters манбаларига кўра, бортдаги ёнғин портлаш хавфини юзага келтириши мумкин бўлган.

Денгиз хавфсизлиги соҳасидаги манбалар эса Уммон қирғоқлари яқинида Саудия байроғи остида ҳаракатланган яна бир газ ташувчи танкер ҳам шикастланганини билдирган. Шу билан бирга, Теҳрон ушбу ҳужумлар учун жавобгарликни ўз зиммасига олмаган.

АҚШ ва Эрон ўртасидаги уруш июнь ойида эришилган вақтинчалик тинчлик келишуви доирасида тўхтатилган эди. Ушбу келишув доимий битим бўйича музокаралар ўтказиш учун 60 кунлик муддат бериши керак эди. Бироқ Қатарда ўтган билвосита музокаралар ўтган ҳафта сезиларли натижасиз якунланган.

Музокараларда, жумладан, Ҳурмуз бўғози хавфсизлиги масаласи ҳам муҳокама қилингани айтилмоқда. АҚШ президенти Дональд Трамп сўнгги ҳафталарда бир неча бор тўлиқ кўламли ҳарбий ҳаракатлар қайта бошланиши мумкинлиги ҳақида огоҳлантирган. У душанба куни журналистлар билан суҳбатда ҳам шу мазмунда баёнот берган.

Эрон ташқи ишлар вазири Аббос Ароқчи эса бунга жавобан, вақтинчалик ўт очишни тўхтатиш меморандуми шартларига мувофиқ, таҳдидлар давом этар экан, якуний келишув бўйича музокаралар бошланмаслигини билдирган.

“Имзойингизни ҳурмат қилинг”, – деб ёзган у X тармоғида.