АҚШ Вакиллар палатаси чоршанба куни Конгресс рухсат бермагунча Эрондаги урушни тўхтатишга қаратилган демократлар резолюциясини қўллаб-қувватлади. Бу овоз бериш уруш юзасидан Конгрессда, жумладан президент Доналд Трампнинг Республикачи партияси вакиллари орасида ҳам хавотир кучайиб бораётганини кўрсатди.

Резолюция 215 нафар конгрессменнинг қўллови ва 208 нафарининг қаршилиги билан қабул қилинди. Тўрт нафар республикачи демократлар билан бирга уруш ваколатлари ҳақидаги ҳужжатни ёқлаб овоз берди. Бу Трамп учун Конгрессдаги навбатдаги сиёсий зарба бўлди, гарчи унинг партияси ҳар икки палатада ҳам кичик устунликка эга бўлса-да.

Овоз бериш асосан рамзий аҳамиятга эга. Резолюция кучга кириши учун уни Сенат ҳам маъқуллаши керак. Бундан ташқари, Трампнинг деярли муқаррар ветосини енгиб ўтиш учун Конгресснинг ҳар икки палатасида учдан икки қисм овоз талаб этилади.

Шунга қарамай, бу овоз бериш Эрон уруши бўйича аввалги учта уруш ваколатлари резолюцияси Вакиллар палатасида тобора камроқ фарқ билан рад этилганидан кейин ўтказилди. Сенат эса ўтган ой шунга ўхшаш алоҳида резолюцияни процессуал овоз беришда олға сурган эди. Бунгача шундай еттита уриниш муваффақиятсиз якунланган.