19 апрель куни Дональд Трамп, АҚШ ҳарбийлари Эрон байроғи остидаги юк кемасини қўлга олганини маълум қилди. Унинг сўзларига кўра, кема АҚШ томонидан ўрнатилган денгиз блокадасини ёриб ўтишга уринган.

Трамп ижтимоий тармоқда эълон қилган баёнотида АҚШ ҳарбийлари кема устидан тўлиқ назорат ўрнатгани ва унинг юклари текширилаётганини айтди. Шунингдек, у кема двигатели бўлимига зарба берилганини ҳам маълум қилди.

Айни пайтда Эрон расмийлари АҚШ билан тинчлик музокараларининг иккинчи босқичида қатнашмаслигини билдирди. Эроннинг ИРНА агентлигига кўра, Теҳрон бу қарорни АҚШ блокадаси, Вашингтоннинг ўзгарувчан позицияси ва “ҳаддан ташқари талаблари” билан изоҳлаган.

Трамп аввалроқ Эрон унинг шартларини қабул қилмаса, мамлакатдаги кўприклар ва электр станциялари йўқ қилинишини айтган эди. Эрон эса агар АҚШ фуқаролик инфратузилмасига зарба берса, Форс кўрфазидаги араб давлатларидаги энергетика объектларига ҳужум қилиш билан таҳдид қилди.

Трампнинг айтишича, АҚШ делегацияси душанба куни кечқурун Покистон пойтахти Исломободга етиб боради. Делегацияга Жей Ди Вэнс бошчилик қилиши кутилмоқда. Шунингдек, таркибда Стив Уиткофф ва Жаред Кушнер ҳам бўлиши мумкин.

Покистон музокараларга тайёргарликни кучайтирди. Хавфсизлик манбаларига кўра, Исломобод яқинидаги ҳарбий базага АҚШнинг икки дона Си-17 транспорт самолёти қўнган. Улар хавфсизлик техникаси ва транспорт воситаларини олиб келган. Шаҳарда жамоат транспорти ҳаракати чекланди, йирик юк машиналари кириши тўхтатилди. Аввалги музокаралар ўтган Серена меҳмонхонаси атрофида симтўрлар ўрнатилди.

Ҳурмуз бўғози атрофидаги вазият ҳам кескинлигича қолмоқда. Ҳурмуз бўғози орқали жаҳон нефтининг қарийб бешдан бир қисми ташилар эди. Аммо уруш бошланганидан кейин бу йўналишдаги ҳаракат бир неча бор тўхтаб, яна тикланди.