Эрон портларининг блокадаси бугун, 13 апрель куни шарқий вақт билан соат 10:00 да (Тошкент вақти билан 19:00 да) бошланади, дейилади АҚШ Марказий қўмондонлиги (CENTCOM)нинг ижтимоий тармоқларда эълон қилинган баёнотида.

Унда таъкидланишича, «АҚШ қуролли кучлари Ҳурмуз бўғози орқали Эронга тегишли бўлмаган портларга кетаётган ва у ердан чиқаётган кемалар учун кема қатнови эркинлигига тўсқинлик қилмайди».

CENTCOM изоҳ беришича, бу қарор АҚШ президентининг фармонига мувофиқ қабул қилинган.

Доналд Трамп аввалроқ АҚШ «Ҳурмуз бўғозига киришга ёки ундан чиқишга уринаётган барча кемаларни истисносиз БЛОКЛАШ»ни бошлашини айтган эди. У, шунингдек, АҚШ Ҳарбий-денгиз кучлари уларга ҳужум қилган ҳар қандай эронликларни «яксон қилиб ташлаши»ни ва Эронга транзит тўловларини тўлаётган ҳар қандай кемани ушлаб қолишини огоҳлантирган.

Навбатдаги кескинлик кучайиши ортидан нефть нархи бир баррель учун 100 доллардан юқорига кўтарилди.

«Яқин орада сиз “блокада” деб аталмиш ҳолат пайтида бензиннинг 4-5 доллар бўлган нархини соғиниб қоласиз», деб ёзди душанбага ўтар кечаси Х ижтимоий тармоғида Эрон парламенти спикери ва Исломободдаги музокараларда Эрон делегацияси раҳбари Муҳаммад-Боқир Қолибоф, эҳтимол, Вашингтонга мурожаат қилиб.