Эрон Ислом инқилоби қўриқчилари корпуси бугун 28 май куни АҚШ ҳарбий базасини нишонга олганини маълум қилди. Бу баёнот АҚШ ҳарбийлари Ҳурмуз бўғози яқинида Эроннинг дрон амалиётига зарба берганидан кейин эълон қилинди.

Вашингтондаги расмийлардан бири Reuters агентлигига маълум қилишича, АҚШ ҳарбийлари Эроннинг тўртта ҳужумчи дронини уриб туширган ва Бандар Аббос порт шаҳрида жойлашган ердаги бошқарув станциясига зарба берган. Унинг айтишича, ушбу станция бешинчи дронни учиришга тайёрланаётган бўлган.

“Бу ҳаракатлар ўлчовли, фақат мудофаа мақсадида амалга оширилган ва сулҳни сақлаб қолишга қаратилган”, деди исмини ошкор қилмаган АҚШ расмийси.

Эрон Ислом инқилоби қўриқчилари корпуси эса буни Бандар Аббос аэропорти яқинида тонгда амалга оширилган АҚШ ҳужумига жавоб деб атади. Tasnim ахборот агентлигига кўра, корпус Бандар Аббос яқинидаги бошқарув станциясига зарба айнан қайси АҚШ авиабазасидан берилган бўлса, ўша базани нишонга олганини билдирган.

Қувайт, ўз ҳудудида йирик АҚШ базаси жойлашган давлат, ракета ва дрон ҳужумларига жавоб қайтараётганини маълум қилди. Бироқ ҳужумлар қаердан амалга оширилганини очиқламади. Исроил ҳам мамлакат шимолида душман ҳаво фаолияти эҳтимоли сабаб сиреналар ишга туширилганини билдирди.

Бу воқеалар АҚШ ва Эрон ўртасида апрель ойи бошида кучга кирган нозик сулҳга таҳдид солаётганини кўрсатди. Кескинлик ортидан нефть нархлари яна кўтарилди. Чоршанба куни 5 фоиздан кўпроқ пасайган АҚШ хом нефть фьючерслари янги хабарлардан кейин 3 фоиздан зиёд қимматлади. Фонд бозорлари пасайди, доллар эса мустаҳкамланди.