АҚШнинг 25 штати Дональд Трамп маъмуриятига қарши судга мурожаат қилди. Даъвогарлар президент томонидан 60 та савдо ҳамкорига нисбатан жорий этилган янги импорт божлари қонунга зид эканини таъкидламоқда.

Маълумотларга кўра, даъво АҚШ Халқаро савдо судига киритилган. Штатлар вакиллари янги тарифлар аввал АҚШ Олий суди томонидан ноқонуний деб белгиланган божларни бошқа ҳуқуқий асос орқали қайта жорий этишга уриниш эканини билдиришяпти.

Трамп маъмурияти июль ойида 60 та савдо ҳамкори, жумладан Европа Иттифоқидан келадиган айрим импорт маҳсулотларига 10–12,5 фоизлик божлар жорий қилган эди. Оқ уй бу қарорни мажбурий меҳнат асосида ишлаб чиқарилган маҳсулотларга қарши кураш ва миллий иқтисодий манфаатларни ҳимоя қилиш зарурати билан изоҳлаяпти. Бироқ даъвогарлар фикрича, президент ушбу тарифларни жорий этишда ўз ваколатларидан чиқиб кетган.

25 штатлар вакиллари суддан ушбу қарорни ноқонуний деб топиш ва унинг ижросини тўхтатишни талаб қилишяпти. Бу иш Трамп маъмуриятининг савдо сиёсатига қарши очилган навбатдаги йирик суд жараёнларидан бирига айланиши мумкин.