Зангиота тумани солиқ инспекцияси бош инспектори ҳамда Бувайда тумани Электр таъминоти корхонаси муҳандиси қўлга тушди.

Терговга қадар текширув материалларига кўра, Зангиота тумани солиқ инспекцияси бош инспектори тадбиркорга қўлланилиши белгиланган жаримани бекор қилиб беришни ваъда қилиб, бунинг эвазига 1000 АҚШ доллари миқдорида пора талаб қилган.

Шунингдек, Бувайда тумани Электр таъминоти корхонаси муҳандиси тадбиркорнинг қуёш панеллари ўрнатиши учун зарур бўлган ҳужжатларни расмийлаштириш ва техник шарт олиб бериш масаласини ижобий ҳал қилиб беришни ваъда қилган. Бу хизматлари эвазига у 5 минг АҚШ доллари талаб қилган бўлиб, сўралган маблағнинг 1000 АҚШ долларини олган вақтида тезкор тадбир давомида ашёвий далиллар билан ушланган.

Видео

Минг долларлик “хизмат” қандай фош бўлди? Зангиота ва Бувайдадаги пора ҳолатлари бўйича тезкор тадбир лавҳаларини видеода кўринг.

Ҳуқуқни муҳофаза қилувчи органлар томонидан ҳар икки ҳолат юзасидан Жиноят кодексининг тегишли моддалари асосида жиноят ишлари қўзғатилди. Айни пайтда ушбу ҳолатлар бўйича дастлабки тергов ҳаракатлари олиб борилмоқда.

Мутасадди идоралар коррупция билан боғлиқ жиноятларга қарши муросасиз кураш давом эттирилиши, давлат хизматида мансаб ваколатларини суиистеъмол қилган шахсларга нисбатан қонун доирасида қатъий чоралар кўрилишини таъкидламоқда.