1 июлдан ёшларнинг давлат хизматига кириши учун янада қулай имкониятлар яратилади.

Янги тартибга кўра, давлат фуқаролик хизматига қабул қилиш жараёнларида очиқлик ва шаффофликни таъминлашга алоҳида эътибор қаратилади.

Хусусан, номзодлар билан ўтказиладиган суҳбат саволлари камида бир ой олдин эълон қилиниши белгиланмоқда.

Бу эса ёшларга олдиндан тайёргарлик кўриш ва ўз билим ҳамда кўникмаларини намоён этиш учун кенг имконият яратади.

Шунингдек, давлат хизматига қабул қилиш жараёнида эълон қилинмаган саволларни бериш амалиётига чек қўйилади.

Натижада баҳолаш жараёни янада адолатли ва барча иштирокчилар учун тенг шарт-шароитлар асосида ташкил этилади.

Бу ўз навбатида ёшларнинг давлат хизматига бўлган қизиқишини оширишга хизмат қилади.

Яна бир муҳим янгилик сифатида айрим лавозимларга ишга қабул қилишда меҳнат стажи талаби бекор қилинади.

Стаж талаб қилинадиган лавозимларда эса энг кўпи билан икки йиллик иш тажрибаси етарли бўлади.

Бу ўз фаолиятини эндигина бошлаётган ёш мутахассисларга давлат хизматида ўз ўрнини топиш ва касбий ривожланиш учун янги имкониятлар эшигини очади.

Шунингдек, бир нафар ёш бирданига ўнлаб ишларга суҳбатга бориш имкониятига ҳам эга бўлади.