Хитой Бош вазири Ли Цян Ўзбекистон билан сиёсий ва иқтисодий ҳамкорликни янада чуқурлаштиришга чақирди. Бу ҳақда China Daily нашри Пекинда Ўзбекистон Бош вазири Абдулла Арипов билан бўлиб ўтган учрашув якунларига таяниб хабар берди.

Маълум қилинишича, музокаралар чоғида икки давлат ўртасида савдо, инвестиция, энергетика, транспорт, рақамли иқтисодиёт ва инфратузилма соҳаларида ҳамкорликни кенгайтириш масалалари муҳокама қилинган.

Ли Цяннинг таъкидлашича, Хитой Ўзбекистон билан “янги даврдаги ҳар томонлама стратегик шериклик” муносабатларини янада мустаҳкамлашни истайди. У, шунингдек, “Хитой – Қирғизистон – Ўзбекистон” темир йўли лойиҳасини тезлаштириш муҳимлигини қайд этган.

Учрашувда визасиз режимдан самарали фойдаланиш, янги авиақатновларни очиш ва маданий-гуманитар алоқаларни кучайтириш масалалари ҳам кўтарилган.

Абдулла Арипов эса Ўзбекистон “Ягона Хитой” сиёсатини қўллаб-қувватлашини билдирган ва икки давлат муносабатлари юқори суръатларда ривожланаётганини таъкидлаган.

Пекин нега Тошкентга алоҳида эътибор қаратмоқда?

Сўнгги йилларда Ўзбекистон Хитойнинг Марказий Осиёдаги асосий ҳамкорларидан бирига айланди. Пекин учун Ўзбекистон бир вақтнинг ўзида ҳам катта бозор, ҳам транспорт йўлаги, ҳам геосиёсий шерик ҳисобланади.

Айниқса, “Хитой – Қирғизистон – Ўзбекистон” темир йўли лойиҳаси Пекин учун стратегик аҳамиятга эга. Ушбу йўл Хитой товарларини Марказий Осиё орқали Яқин Шарқ ва Европага тезроқ олиб чиқиш имконини беради.

Ўзбекистон учун эса бу ҳамкорлик янги инвестициялар, саноат лойиҳалари,

транспорт инфратузилмаси, энергетика ва технология соҳаларида қўшимча имкониятлар дегани.

Шу билан бирга, таҳлилчилар Тошкент Хитой билан муносабатларда иқтисодий манфаат ва ташқи сиёсий мувозанатни сақлашга ҳаракат қилаётганини таъкидламоқда. Чунки Ўзбекистон бир вақтнинг ўзида Россия, Ғарб ва Туркия билан ҳам фаол ҳамкорликни давом эттирмоқда.

Пекин учрашувида айтилган “кўп томонлама мувофиқлашув” ва “янги халқаро тартиб” каби иборалар эса Хитойнинг Марказий Осиёдаги сиёсий таъсирини кучайтиришга интилаётганини кўрсатади.

Экспертлар фикрича, Хитой ва Ўзбекистон муносабатлари кейинги йилларда янада стратегик тус олиши мумкин. Айниқса, транспорт, яшил энергетика ва рақамли иқтисодиёт соҳалари асосий драйверга айланиши кутилмоқда.