Сўнгги икки ҳафтада Ўзбекистонда мол ва қўй гўшти нархлари сезиларли ошди. Таҳлилларга кўра, мамлакат бўйлаб мол гўштининг ўртача нархи 122 минг сўмдан, қўй гўшти эса 133 минг сўмдан юқори даражага етган. Айниқса, Тошкент шаҳрининг Юнусобод туманида гўшт нархлари энг юқори кўрсаткични қайд этмоқда.

Гўшт нархларининг ўсишига бир нечта омиллар таъсир кўрсатаётгани таҳмин қилинмоқда. Аввало, сўнгги йилларда маҳаллий ишлаб чиқарувчилар томонидан етиштирилган маҳсулотнинг бир қисми экспорт бозорларига йўналтирилмоқда. Албатта, экспорт мамлакат иқтисодиёти учун муҳим, аммо ички бозорда талаб юқори бўлган шароитда бу ҳолат нархларга босим ўтказиши табиий ва бу адолатдан эмас.

Шу билан бирга, чорвачилик соҳасида ҳам қатор муаммолар сақланиб қолмоқда. Ем-хашак нархининг ошиб бориши, сув таъминоти билан боғлиқ қийинчиликлар, энергия ва транспорт харажатларининг кўпайиши чорвадорлар учун маҳсулот таннархини оширмоқда. Натижада бозорга чиқарилаётган ҳар бир килограмм гўшт аввалгидан қимматроққа тушмоқда.

Мутахассислар яна бир муҳим масалага эътибор қаратмоқда. Айрим ҳолларда ички бозорга арзонроқ, сифати маҳаллий маҳсулот билан тенг бўлмаган импорт гўштлари кириб келмоқда. Бироқ истеъмолчиларнинг катта қисми маҳаллий, янги ва сифатли гўштни афзал кўргани учун унга бўлган талаб пасаймаяпти.

Энг асосий омиллардан бири эса аҳоли сони ва истеъмол маданиятининг ўзгариб бораётганидир. Бугун соғлом турмуш тарзига қизиқиш ортиб, парҳезшунослар ва шифокорлар инсон организми учун оқсилнинг аҳамиятини кўпроқ таъкидламоқда. Озиш, мушак массасини сақлаш ва соғлом овқатланиш дастурларида ҳам гўшт, тухум ва бошқа оқсилга бой маҳсулотлар тавсия қилинмоқда. Бу эса гўштга бўлган талабни йилдан-йилга оширмоқда.

Бозор иқтисодиётининг оддий қонунига кўра, талаб таклифдан тезроқ ўсганда нархлар ҳам юқорига ҳаракат қилади. Шу боис мутахассислар яқин ойларда ҳам гўшт нархларида маълум даражада ўсиш сақланиб қолишини прогноз қилмоқда.

Демак, гўшт нархларининг қимматлашиши фақат бир омил билан эмас, балки экспорт ҳажмлари, чорвачилик харажатлари, аҳолининг ўсиб бораётган эҳтиёжлари ва соғлом овқатланишга бўлган қизиқишнинг кучайиши каби бир-бирига боғлиқ жараёнлар билан изоҳланади. Ички бозор барқарорлигини таъминлаш учун маҳаллий чорвачиликни қўллаб-қувватлаш, маҳсулот ишлаб чиқариш ҳажмини ошириш ва озиқ-овқат хавфсизлигини мустаҳкамлаш муҳим аҳамият касб этади.