UzAuto Motors омборларида ўн минглаб сотилмаган автомобиль тўпланиб қолган, етказиб берувчилар олдидаги қарзлар эса триллионлаб сўмга етган. Компанияга айни пайтда ҳар бир харидор ва ҳар бир тўлов зарур.

Аммо Элтузарнинг UzAuto Motors’даги инсайдери тақдим этган маълумотга кўра, компаниянинг сотув тизими 10 июлдан бери ишламаяпти.

Манбанинг айтишича, уч кундан буён Ўзбекистон бўйлаб харидорлар автомобиль учун пул тўлай олмаяпти. Тўлов амалга ошмагани сабабли машинаси тайёр бўлган фуқаролар ҳам уни дилерлик марказларидан олиб чиқиб кетолмай, кутишга мажбур бўлмоқда.

Элтузар манба хавфсизлиги нуқтаи назаридан унинг шахсини ошкор этмайди.

Инсайдер маълумотига кўра, носозлик республика бўйлаб сотув жараёнига таъсир қилган. Тизимни тиклаш ишлари олиб борилаётган бўлса-да, муаммо уч кундан бери тўлиқ бартараф этилмаган.

Вазиятнинг қизиқ томони шундаки, UzAuto Motors бир тарафдан автомобиллар сотуви режадан ортда қолаётгани ва омборлар тайёр маҳсулотга тўлиб кетгани билан курашмоқда. Иккинчи тарафдан эса машина харид қилишга ва пул тўлашга тайёр мижозларнинг ўзи тизимдаги носозлик сабабли сарсон бўлмоқда.

Яъни автомобиль бор. Харидор бор. Пул бор. Аммо савдони амалга оширадиган тизим ишламаяпти.

Элтузар аввалроқ UzAuto Motors’нинг ички ҳужжатларига таяниб, компаниядаги молиявий ва ишлаб чиқариш ҳолати ҳақида танқидий мақола эълон қилган эди.

Унда 2026 йил биринчи ярмида 195 мингта автомобиль сотиш режалаштирилгани, аммо 25 июнь ҳолатига атиги 144 мингта машина сотилгани айтилган.

Шунингдек, компания омборларидаги тайёр автомобиллар сони қисқа муддат ичида 37 мингтадан 85 минг 310 тагача кўпайгани, уларнинг умумий қиймати эса 15 триллион сўмдан ошгани қайд этилган.

Фақат Cobalt автомобилларининг ўзи қарийб 36 мингта бўлиб, уларнинг қиймати 5,6 триллион сўмга яқин экани кўрсатилган.

Бундан ташқари, эҳтиёт қисмлар ва бошқа маҳсулотларни етказиб берувчи корхоналар олдидаги кечиктирилган тўловлар миқдори 2,2 триллион сўмга етгани ҳақида маълумотлар келтирилган эди.

Бундай шароитда сотув тизимининг уч кунлаб ишламай қолиши оддий техник носозликдан кўра жиддийроқ оқибатларга олиб келиши мумкин. Чунки ҳар бир кечиккан тўлов компаниянинг пул оқимига, дилерлик марказлари фаолиятига ва автомобилларни омборлардан чиқариш жараёнига таъсир қилади.

Энг катта зарарни эса одатдагидек харидор кўрмоқда. Айрим фуқаролар автомобил учун пул тўлашга тайёр бўлса-да, машиналарини олиб кетолмай, дилерлик марказлари ва банклар ўртасида сарсон бўлаётгани айтилмоқда.

Ҳозирча UzAuto Motors сотув тизимидаги носозликнинг сабаблари, унинг қанча харидорга таъсир қилгани ва муаммо қачон тўлиқ бартараф этилиши ҳақида жамоатчиликка батафсил тушунтириш бергани йўқ.

Элтузар UzAuto Motors’дан қуйидаги саволларга жавоб кутади:

Сотув тизими нега уч кундан бери ишламаяпти? Носозлик республика бўйича нечта харидорга таъсир қилди? Тўлов муддати ўтиб кетган фуқароларнинг шартномалари бекор қилинмайдими? Автомобилини ўз вақтида олиб кетолмаган харидорларга қандай енгиллик берилади? Тизим қачон тўлиқ тикланади?

UzAuto Motors расмий муносабат билдирса, Элтузар уни ҳам эълон қилишга тайёр.