Урганч шаҳридаги Ички ишлар вазирлиги ҳузуридаги Жазони ижро этиш департаментининг 11-сон тергов ҳибсхонасида адвокатлар саҳардан шомгача учрашув учун навбат кутади.
Маълумотларга кўра, ҳибсхонада 200–300 нафарга яқин шахс сақланади. Аммо адвокатлар билан учрашиш учун атиги 3 та хона бор.

Шу сабаб адвокатлар навбатда соатлаб кутишга мажбур бўлмоқда. Айрим ҳолатларда улар учрашув ўтказа олмай, орқага қайтиб кетишяпти.
Бу оддий қулайлик масаласи эмас. Адвокат ҳимоясидаги шахс билан учрашиб, унга ҳуқуқий ёрдам бериши керак. Узоқ навбатлар бу жараённи қийинлаштирмоқда.

Хўш, нега хоналар сони кўпайтирилмаяпти? Нега адвокатлар соатлаб кутишига тўғри келмоқда? Нега учрашувларни ташкил қилиш жараёни тезлаштирилмайди? Баъзи ҳолларда адвокатлар учрашувни ташкил қиладиган ходимларни ҳам узоқ кутишади. Бу сарсонлик тергов ҳибсхонасида ташкилий муаммолар борлигини кўрсатиши мумкин.

Адвокатни тақдири ҳал бўлаётган инсон кутади. Заррача инсонийлик йўқми бу тизимда? Ҳимоя ҳуқуқи қоғозда қолиб кетяпти. Масъулларнинг парвойи фалак.