Путин парад куни «дело идёт к завершению» дея Украинадаги уруши тугашига шаъма қилди. Уруш бошида Зеленскийни наркоман ва узурпатор (ҳокимиятни ноқонуний эгаллаб олган) деб атаган Путин энди душманини «господин Зеленский»,  «Президент Зеленский» деб атамоқда. Чалғитувчи илтифотларми бу? Шу кунларда Россия президенти бункерга кириб кетгани ҳақида иддаолар сизиб чиқди. Шу фонда Россия ва Беларус ядровий машқлар бошлагани расман тасдиқланди. Нималар бўляпти ўзи?

Прогноз қилиш – энг ношукур иш. Нотўғри чиқса ҳамма кулади, тўғри чиқса конспирологлар нашрни «масон» деб айблайди. Шунинг учун эҳтимолий вариантларни бирма-бир санайлик. Ўрис бош қўмондонининг бу ҳаракатлари ҳақиқий тинчлик музокарасига ишора бўлиши мумкин. Ёки Россия ўзини “устун ҳолатда” кўрсатиш учун сиёсий сигнал беряпти. Буюк геостратеглар Ғарб ва НАТОга психологик босим усулини қўллаётган бўлиши ҳам мумкин.

Демак, эҳтимолий сценарийлар қуйидагича:

Уруш давом этади, лекин ядровий босқичга ўтмайди. Ҳозирча томонлар ядровий қурол ҳақида гапиряпти, лекин амалда уни ишлатиш кўзда тутилмаган. Зотан ҳатто тактик ядровий зарба ҳам назорат қилиб бўлмайдиган глобал оқибатларга олиб келиши аниқ. Россия, НАТО, Хитой ҳам бундай оқибатни истамайди.

Иккинчи сценарийга кўра, Россия босимни оширади. Беларусдаги машқлар, “Орешник” ракеталари, ядровий баёнотлар — буларнинг бари ҳарбий-психологик сигнал. Мақсад – Ғарбни қўрқитиш,  НАТО аъзолари орасида зиддият чиқариш ва Украинани музокарага мажбурлаш бўлиши мумкин.

Музлатилган конфликт вариантида тўхталамиз. Охир-оқибат Корея сценарийсига ўхшаш ҳолат такрорланиши эҳтимоли катта. Фронт чизиғи деярли қотиб қолади,  расман тинчлик битими бўлмайди, катта ҳужумлар камаяйиб уруш йиллаб чўзилади.

Агар бир палакат босиб тасодифий эскалация юз бермаса, биз «Корея зиддияти 2»ни Украина ва Россияда қайта кўрамиз. Бирор дрон ёки ракета НАТО ҳудудига тушиб кетса, ҳужум НАТО чегарасига тақалса ёки олигархлар таҳдидидан безган Путин «э борей» деб вазиятни кескинлаштириб юборса масала анча оғирлашади.

Ҳозир гегемон давлатлар эҳтиёткор ҳаракат қиляпти. Ҳозирча Россия раҳбарияти фавқулодда ядровий тайёргарлик ёки умумий эвакуация каби аниқ белгиларни кўрсатгани йўқ.  Ҳозирча кузатамиз.