Фарғона вилояти Учкўприк тумани туғруқхонасида чақалоқ нобуд бўлгани айтилмоқда. Оиланинг маълум қилишича, ҳомила тескари келаётгани олдиндан маълум бўлган, аммо вақтида кесарча кесиш амалиёти ўтказилмаган.

Олмурод қишлоғида яшовчи ҳомиладор аёл 30 май куни кечаси туғруқхонага олиб келинди. Яқинларига кўра, аёл шифокорлардан операция қилишни сўраган, бироқ дўхтирлар уни “ўзи туғади” дейишди. 31 май куни эрталаб чақалоқ туғруқ жараёнида нобуд бўлди.

Марҳум чақалоқнинг отаси тиббий ҳужжатларни расмга олмоқчи бўлганида, шифокорлар бунга тўсқинлик қилган. Ота дарҳол 102 га қўнғироқ қилган, аммо воқеа жойига келган ИИБ ходими ҳам аниқ чора кўрмагани иддао қилинмоқда.

Ҳозирча туман туғруқхонаси, соғлиқни сақлаш идоралари ёки ҳуқуқни муҳофаза қилувчи органлар ҳолат юзасидан оилага расмий изоҳ бермади.

Ушбу ҳолат шаффоф текширилиши, тиббий ҳужжатлар тафтиш қилиниши ва масъуллар ҳаракатига қонуний баҳо берилиши лозим. Лекин ота-онанинг «казо-казоларга» етмас даражада қўли калта. Осмон йироқ, ер қаттиқ. Кап-катта жиноятлар изи йўқолиб кетаётган бир пайтда мурғак гўдакнинг вафоти масъулларга чивин чаққанчалик таъсир қилармикан?