Туркияда камида уч нафар ҳукумат вазирига тегишли iPhone телефонлари алмаштирилди. Бунга Apple компаниясининг ушбу қурилмалар ёлланма жосуслик дастури орқали нишонга олинган бўлиши мумкинлиги ҳақидаги огоҳлантириши сабаб бўлган.

Бу ҳақда Middle East Eye нашрининг Туркия бюроси раҳбари Роғиб Сойлу воқеадан хабардор, аммо исми ошкор этилмаган манбаларга таяниб хабар берди. Нашр қайси вазирлар нишонга олинганини очиқламаган.

Маълумотларга кўра, вазирлар 13 август куни Apple’дан хавф ҳақида махсус огоҳлантириш олган. Бу компания томонидан дунёнинг 110 мамлакатидаги эҳтимолий нишонларга юборилган кенг кўламли огоҳлантириш кампаниясининг бир қисми бўлган.

Apple компанияси TechCrunch’га огоҳлантиришлар айнан шу вақтда ва шу кўламда юборилганини тасдиқлаган.

Middle East Eye билан суҳбатлашган туркиялик расмийга кўра, Анқара ҳукумати вазирларнинг телефонларини бузиб киришга уринишлар муваффақиятсиз тугаган, деб ҳисобламоқда. Расмий буни вазирлар қўллаган қўшимча хавфсизлик чоралари ва шифрланган иловалар билан изоҳлаган.

Хабарга кўра, Туркиянинг Киберхавфсизлик президентлиги Apple огоҳлантиришидан кейин телефонларни текширган, уларни алмаштирган ва қўшимча ҳимоя чораларини жорий этган.

Айни пайтда, нашр жосуслик дастури ҳақиқатан ҳам телефонларга ўрнатилганини тасдиқловчи криминалистик ёки техник далиллар келтирмаган.

Анқарадаги расмийлар эҳтимолий киберҳужум ортида сиёсий ва иқтисодий манфаатлар аралашмаси бўлиши мумкин, деб ҳисобламоқда. Бироқ ҳужум буюртмачисини аниқлаш қийин кечаётгани айтилган.

Middle East Eye маълумотига кўра, айрим гумонлар Исроил ва Греция томон йўналган. Аммо нашр бу икки давлатдан бирортасини ҳодиса билан боғлайдиган далил йўқлигини алоҳида таъкидлаган.

Ҳозирча асосий гумонлардан бири Pegasus жосуслик дастурига қаратилмоқда. Pegasus Исроилнинг NSO Group компанияси томонидан ишлаб чиқилган бўлиб, у смартфонларга яширин кириш ва маълумотларни кузатиш имконини беради.

Минтақадаги бир қатор ҳукуматлар илгари Pegasus технологиясини сотиб олгани маълум.