АҚШ президенти Дональд Трамп Украина президенти Владимир Зеленскийни Россия ҳудудидаги нефтьни қайта ишлаш заводлари ва дизель ёқилғиси захираларига қарши ҳужумларни тўхтатишга чорлади.

Трамп журналистлар билан мулоқотда Украина томонининг Россия энергетика инфратузилмасига берaётган зарбаларини танқид қилди. Унинг таъкидлашича, бундай ҳужумлар Россиянинг ёқилғи таъминотини тўхтатиш билан бирга, жаҳон энергетика бозорига ҳам салбий таъсир кўрсатиши мумкин.

«У Россиядаги дизель ёқилғиси захираларига зарба беришни тўхтатиши керак. Биз бу ҳақда жаноб Зеленский билан гаплашдик. Бошқа кўплаб нишонлар бор», – деди Трамп.

АҚШ президентининг фикрича, Россиядаги нефтьни қайта ишлаш объектларига қилинган зарбалар бугун дунё энергетика бозорида беқарорликни кучайтириши мумкин.

Трампнинг бу баёноти Вашингтон Украина томонининг Россия ҳудудидаги энергетика объектларига қарши узоқ масофали зарбаларидан хавотирланаётганини яна бир бор кўрсатди.