АҚШ президенти Доналд Трамп чоршанба куни Пекинга етиб борди. У пайшанба куни Хитой раиси Си Цзинпин билан музокара ўтказиши кутилмоқда.

Трамп учрашувда Эронга қарши қиммат ва жамоатчилик норозилигини уйғотган урушни тўхтатишда Хитойдан ёрдам сўраши мумкин. Бироқ таҳлилчилар фикрича, у кутган даражадаги қўллаб-қувватловни олиши эҳтимоли паст.

Сўнгги хабарларга кўра, Эрон уруши Яқин Шарқдаги иттифоқлар ва кучлар мувозанатини тез ўзгартирмоқда. Исроил бош вазири Биньямин Нетаньяху март ойида Бирлашган Араб Амирликларига яширин сафар қилиб, шайх Муҳаммад бин Зоид билан учрашгани маълум қилинди. Исроил томони бу музокараларни БАА билан муносабатларда “тарихий бурилиш” деб атади.

Шу билан бирга, Саудия Арабистони қирувчи самолётлари Ироқдаги Эрон қўлловидаги гуруҳларга зарба бергани хабар қилинди. Манбаларга кўра, Қувайт ҳудудидан ҳам Ироқ томон жавоб зарбалари берилган.

Теҳрон эса Ҳурмуз бўғози устидан назоратни кучайтирмоқда. Урушдан аввал бу йўл орқали дунё нефтининг бешдан бири ташилар эди. Эрон Ироқ ва Покистон билан нефть ҳамда суюлтирилган газ етказиб бериш бўйича келишувларга эришган.

Эрон расмийлари бўғоз устидан назоратни узоқ муддатли стратегик мақсад сифатида кўраётганини билдирмоқда. Армия вакилига кўра, бу йўл транзитидан олинадиган даромад Эрон нефть даромадидан икки баробар кўп бўлиши мумкин.

Бир ойдан кўпроқ вақт олдин кучга кирган мўрт сулҳга қарамай, АҚШ ва Эроннинг урушни якунлаш бўйича талаблари ҳамон бир-биридан йироқ. Вашингтон Теҳрондан ядровий дастурдан воз кечишни ва Ҳурмуз бўғози устидан назоратни бўшатишни талаб қилмоқда. Эрон эса уруш зарари учун товон, АҚШ блокадасини тугатиш ва барча фронтларда жангларни тўхтатишни талаб қилмоқда.

АҚШ вице-президенти Жей Ди Вэнс музокараларда маълум силжиш борлигини айтди. Унинг сўзларига кўра, асосий масала Эрон ҳеч қачон ядровий қуролга эга бўлмаслигига кафолат берадиган чоралар етарли даражада таъминланишидир.