АҚШ президенти Дональд Трамп навбатдаги тиббий кўрикдан ўтди. Оқ уй томонидан эълон қилинган ҳисоботга кўра, 79 ёшли президентнинг соғлиғи яхши ҳолатда бўлиб, у давлат раҳбари ва қуролли кучлар олий бош қўмондони вазифаларини бажаришга лаёқатли.

Президентнинг шахсий шифокори Шон Барбабелланинг маълум қилишича, юрак-қон томир тизими текширувлари Трампнинг “қон томирлари ёши” ҳақиқий ёшидан тахминан 14 йилга кичик эканини кўрсатган.

Когнитив қобилиятлар ҳам текширилган. Ақлий фаолиятдаги бузилишлар, жумладан деменция ва Альцгеймер касаллиги аломатларини аниқлаш учун ўтказилган тестда Трамп максимал – 30 баллдан 30 балл тўплаган.

Шу билан бирга, текширув натижалари президентнинг вазни ошганини ҳам кўрсатди. Ҳозирда Трамп 108 килограмм вазнга эга бўлиб, бу клиник семириш чегарасига яқин ҳисобланади. Шунингдек, ҳисоботда оёқларда енгил шиш ва қўлларда кўкаришлар борлиги қайд этилган. Шифокорлар бу ҳолатни тез-тез қўл сиқишиш ва аспиринни мунтазам қабул қилиш билан изоҳлаган.

Кўрик якунларига кўра, шифокорлар Трампга парҳез тутиш, жисмоний фаолликни ошириш, вазн ташлаш ҳамда аспирин дозасини камайтиришни тавсия қилган.