АҚШ президенти Доналд Трамп шанба куни Уолтер Рид миллий ҳарбий тиббиёт марказида тиббий кўрикдан «ҳозиргина ўтгани»ни маълум қилди. Оқ уй изоҳига кўра, президент май ойи охирида ўтказилган тиббий текширувни назарда тутган.

«Мен Уолтер Ридда мукаммал тиббий кўрикдан ҳозиргина ўтдим. Бундай текширувдан ҳар олти ойда ўтаман. Шунингдек, яна бир когнитив тест топширишни сўрадим. Бундай тестни уч марта топширган ягона президентман ва уларнинг барчасини аъло даражада бажардим — ҳар бир саволга тўғри жавоб бердим», — деб ёзди Трамп ижтимоий тармоқда.

Июнь ойида 80 ёшга тўлган Трампнинг май ойидаги тиббий кўригидан сўнг Оқ уй унинг соғлиғи аъло даражада эканини маълум қилган эди.

Трамп бу гапларни The New York Times журналистлари Мэгги Ҳаберман ва Жонатан Суонни танқид қилган ижтимоий тармоқдаги постида келтирди. Журналистларнинг Трампнинг ҳокимиятга қайтиши ҳақидаги янги китоби жамоатчиликда кенг муҳокамага сабаб бўлди.

«Ҳокимият алмашинуви: Доналд Трампнинг империявий президентлиги ичидан» номли китобда Оқ уйдаги айрим ходимларнинг Трампнинг ёши, чидамлилиги ва жисмоний ҳолатидан хавотирлангани ҳақида сўз боради.

80 ёшли Трамп АҚШ президенти лавозимида ишлаган энг кекса шахс ҳисобланади. Кекса сиёсий етакчиларнинг соғлиғи ва ақлий қобилиятига оид саволлар Вашингтонда мунтазам муҳокама қилинадиган мавзуга айланган.

Собиқ президент Жо Байденнинг когнитив қобилиятига доир хавотирлар ҳам унинг 2024 йилги президентлик сайловида қайта номзодини қўйишдан воз кечишига олиб келган эди.

Трамп эса когнитив тестлардаги натижаларини тез-тез тилга олиб, уларни бир неча бор топширгани ва ҳар сафар энг юқори натижа қайд этганини таъкидлаб келади.

Манба: Рейтерс агентлиги