АҚШ президенти Дональд Трамп Пентагонга Жанубий Корея билан ўтказиладиган қўшма ҳарбий машғулотлар ҳажмини сезиларли даражада қисқартириш бўйича кўрсатма берганини маълум қилди. У бундай қарорга Шимолий Корея етакчиси Ким Чен Ин билан «жуда яхши муносабатлари»ни сабаблардан бири сифатида кўрсатди.

Трамп бу ҳақда якшанба куни Truth Social тармоғида ёзди. Президент АҚШ ва Жанубий Корея ўртасидаги йирик ҳарбий машғулотларни қиммат ва Пхеньянга нисбатан нотўғри сигнал деб баҳолаган.

«Бу машғулотлар нафақат жуда қиммат, харажатларнинг катта қисмини, одатдагидек, АҚШ тўлайди, балки мутлақо номақбул ва душманона сигнал ҳам юборади», деган Трамп.

У машғулотларни бутунлай бекор қилиш учун «жуда кеч» бўлганини, аммо уларнинг миқёсини камайтириш бўйича Пентагонга топшириқ берганини билдирган. Трамп Пентагонга Жанубий Корея билан қўшма машғулотларни сезиларли қисқартиришни буюрган.

18 МИНГ ЖАНУБИЙ КОРЕЯЛИК ҲАРБИЙ ИШТИРОК ЭТИШИ РЕЖАЛАШТИРИЛГАН

АҚШ ва Жанубий Кореянинг йиллик Ulchi Freedom Shield ҳарбий машғулотлари 17 августдан 27 августгача ўтказилиши режалаштирилган. Машғулотларда қарийб 18 минг нафар Жанубий Корея ҳарбий хизматчиси қатнашиши кутилмоқда ва унинг миқёси аввалги йилларга яқин бўлиши режалаштирилган эди.

АҚШ ҳарбийлари машғулотларда Шимолий Кореянинг сўнгги йилларда ўзгараётган ҳарбий салоҳияти, жумладан дронлар, GPS тизимига халал бериш, киберҳужумлар ҳамда Украина урушида тажриба орттирган шимолий кореялик ҳарбийлар омили ҳам ҳисобга олинишини айтган.

Пхеньян эса АҚШ ва Жанубий Корея қўшма машғулотларини мунтазам равишда ўзига қарши ҳарбий таҳдид сифатида баҳолаб келади.

Шимолий Корея Ташқи ишлар вазирлиги ҳам навбатдаги машғулотларни кескин танқид қилиб, мамлакат ўзини ҳимоя қилиш ва ядровий тийиб туриш имкониятларини кучайтириш ҳуқуқига эга эканини таъкидлаган.

ҚАРОР ШИМОЛИЙ КОРЕЯ РАКЕТА СИНОВЛАРИДАН КЕЙИН ЯНГРАДИ

Трампнинг баёноти Корея яриморолида ҳарбий таранглик яна кучайган бир пайтга тўғри келмоқда.

Шимолий Корея август ойида бир неча кун оралиғида баллистик ракета учирди. 11 августда Вонсан ҳудудидан учирилган ракеталардан бири тахминан 700 километр масофани босиб ўтган. Бундай баллистик ракета синовлари БМТ Хавфсизлик Кенгаши резолюциялари билан тақиқланган.

Шунга қарамай, Трамп ўз баёнотида Ким Чен Ин билан муносабатларини алоҳида таъкидлаб, Шимолий Кореяни ўз президентлиги даврида «таҳдид солмаган ва ҳурмат билан муносабатда бўлган» мамлакат сифатида тасвирлаган.

ТРАМП ЖАНУБИЙ КОРЕЯНИНГ ЭРОН БЎЙИЧА ПОЗИЦИЯСИДАН ҲАМ НОРОЗИ

Трамп баёнотида Жанубий Кореяни яна бир масалада танқид қилди.

Унинг айтишича, яқинда Жанубий Корея президентидан АҚШга Эронни «ядросизлантириш» ҳаракатларига қўшилишни хоҳлайдими, деб сўраган.

Трампнинг ёзишича, Сеул бунга «Йўқ, раҳмат» деб жавоб берган.

Reuters Трамп ўз постида Жанубий Кореянинг Эронга қарши АҚШ бошчилигидаги ҳаракатларга қўшилмаганини ҳам тилга олганини тасдиқлади.

Бу изоҳ Трампнинг Сеул позициясидан норози эканини ва бу норозилик АҚШ-Жанубий Корея ҳарбий ҳамкорлигига ҳам таъсир кўрсатаётган бўлиши мумкинлигини кўрсатади.

ТРАМП БУНДАЙ ҚАРОРНИ АВВАЛ ҲАМ ҚАБУЛ ҚИЛГАН

Трампнинг Ким Чен Ин билан муносабатлар туфайли АҚШ-Жанубий Корея ҳарбий машғулотларини чеклаши биринчи марта эмас.

2018 йилда Сингапурда Ким Чен Ин билан тарихий саммитдан кейин Трамп қўшма ҳарбий машғулотларни тўхтатишини эълон қилган ва уларни «жуда провокацион» ҳамда қиммат деб атаган эди.

Трамп ва Ким ўртасидаги дипломатия 2019 йилдаги Ҳаной саммити натижасиз тугагач жиддий сусайган. Шундан сўнг Пхеньян ўз ядровий ва ракета дастурларини янада жадал ривожлантира бошлади.

Энди, орадан етти йил ўтиб, Трамп яна Ким Чен Ин билан шахсий муносабатларини АҚШнинг Корея яриморолидаги ҳарбий сиёсатини ўзгартириш учун муҳим далил сифатида кўрсатмоқда.