АҚШ президенти Доналд Трамп Эрон ядровий қуролга эга бўлмасликка рози бўлганини айтди. У бу ҳақда чоршанба куни эфирга узатилган New York Post’нинг “Pod Force One” дастурига берган интервьюсида билдирган.

“Улар аллақачон ядровий қуролга эга бўлмасликка рози бўлишган”, деди Трамп Эрон ҳақида гапирар экан.

Трампдан Эрон олий раҳбари Мужтабо Хоманаийнинг АҚШ билан урушни тугатиш бўйича музокаралардаги иштироки ҳақида сўралганда, у Хоманаий жараёнда иштирок этаётганини айтди.

“У иштирок этяпти, албатта. Менимча, улар уни жуда ҳурмат қилишади”, деди АҚШ президенти.

Трампнинг айтишича, у Эрон раҳбарининг саломатлиги яхши эмаслиги ҳақида эшитган, аммо Хоманаий музокаралар давомида ўз розилигини бермоқда. Шу билан бирга, Трамп ҳали Хоманаий билан шахсан учрашмаганини таъкидлади.

“Мен у билан учрашишни истардим. Ишлар қандай кечишига қараб, эҳтимол, қачондир учрашармиз”, деди у.

АҚШ президенти Эрон билан урушни муваффақиятли деб баҳолади. Унинг сўзларига кўра, Эрон ҳарбий жиҳатдан мағлуб этилган. Reuters хабарида қайд этилишича, 28 февраль куни АҚШ ва Исроил зарбалари билан бошланган можаро жаҳон энергия бозорларига таъсир кўрсатган ва ноябрдаги Конгресс сайловлари арафасида америкаликлар орасида норозиликларга сабаб бўлган.

“Эрон катта муваффақият. Нима бўлишини кўрамиз. Биз келишув устида ишлаяпмиз. Агар келишув бўлса, яхши. Бўлмасам майли. Биз бошқа йўл билан қиламиз”, деди Трамп.

У “бошқа йўл” деганда нимани назарда тутганига аниқлик киритмади. Бироқ у аввалроқ келишувга эришилмаса, АҚШ зарбаларни қайта бошлаши мумкинлигини айтган эди.