“Хавфсиз ва соғлом юрт” кенг қамровли тезкор-профилактик тадбирлар ойлиги давомида Тошкент вилояти ва Тошкент шаҳрида гиёҳванд моддалар билан боғлиқ икки ҳолат аниқланди.

Маълум қилинишича, Тошкент туманида профилактика инспекторига келиб тушган мурожаат асосида хонадон холислар иштирокида кўздан кечирилган. Текширув давомида қоғозга ўралган гашиш моддаси топилган. ИИВ Жамоат хавфсизлиги департаменти ушбу ҳолатни атрофлича ўрганмоқда.

Шунингдек, Тошкент шаҳрининг Янгиҳаёт туманида ППХ ходимлари томонидан катта миқдордаги наркотик моддаларни “закладка” усулида яширин жойларга жойлаб кетиш билан шуғулланган шахслар қўлга олингани айтилмоқда.

Видео

Ҳуқуқ-тартибот идоралари гиёҳвандлик ва наркожиноятларга қарши кураш кучайтирилаётганини айтмоқда. Ушбу видеода Тошкент вилояти ва Янгиҳаёт туманидаги икки ҳолатдан лавҳалар жамланган.

Мазкур ҳолатлар мамлакатда наркотик моддаларни ноқонуний ташиш, сақлаш ва сотишга қарши кураш кучайтирилаётган бир пайтда кузатилмоқда. Ўзбекистонда 2024–2028 йилларга мўлжалланган гиёҳвандлик ва наркожиноятларга қарши курашиш бўйича Миллий стратегия амалга оширилмоқда.

Унда аҳоли, айниқса ёшлар орасида гиёҳвандликка қарши иммунитетни шакллантириш, профилактика ишларини кучайтириш, наркотрафикка қарши идоралараро ҳамкорликни мустаҳкамлаш ва жамоатчилик хабардорлигини ошириш асосий вазифалардан бири сифатида белгиланган.