Ўзбекистонлик шифокор Ҳасан Камилов Тошкентдан Сеулга учаётган самолётда тўсатдан аҳволи оғирлашган аёлга шошилинч тиббий ёрдам кўрсатиб, унинг ҳаётини сақлаб қолди. Бу ҳақда Соғлиқни сақлаш вазирлиги Матбуот хизмати хабар берди.

Маълум қилинишича, парвоз вақтида йўловчи аёлнинг аҳволи кескин ёмонлашган. Самолёт экипажи зудлик билан тиббий ёрдам кўрсатиш учун шифокорни чақирган.

Воқеа жойига етиб келган Ҳасан Камилов аёлнинг оғир шок ҳолатида эканини, танаси совиб, кўкариш белгилари кузатилганини аниқлаган. Шифокор тезкорлик билан беморга зарур тиббий ёрдам кўрсатишга киришган.

У ўзи билан олиб юрадиган шошилинч тиббий ёрдам воситалари, шунингдек, самолёт экипажи тақдим этган кислород ниқоби ва тиббий жиҳозлардан фойдаланган. Кўрилган тезкор чоралар натижасида аёлнинг ҳаёти сақлаб қолинган.

Ҳасан Камилов Самарқанд шаҳридаги хусусий клиника раҳбари, Тошкент давлат тиббиёт университети изланувчиси ҳисобланади. Айни пайтда у Корея Республикасининг Чхунбук университетида малака оширмоқда.

Шифокорнинг самолёт бортидаги тезкор ва малакали ҳаракатлари инсон ҳаётини асраб қолишда тиббиёт ходимларининг касбий маҳорати ва масъулияти нақадар муҳим эканини яна бир бор намоён этди.