Ижтимоий тармоқларда  профилактика инспекторлари ногиронлиги бор аёлни калтаклагани ҳақида хабарлар тарқалди. ИИББ ҳодисага изоҳ берди.

Идора маълумотларига кўра, 1995-йилда туғилган аёл (ногиронлиги йўқ) 2025-йил январдан августгача 1996-йилда туғилган таниши билан Мирзо Улуғбек туманида жойлашган уйда расмий никоҳсиз яшаган (уй унга тегишли). 2025-йил декабр ойида у мазкур уйни 1999-йилда туғилган фуқарога ижарага берган.

10-декабр куни фуқаро онаси ва синглиси билан бирга ушбу уйга келиб, у ерда яшаётган ижарачилар билан жанжаллашган. Воқеа жойига етиб келган профилактика инспекторлари можарони тўхтатишга уринган. Ҳодиса давомида аёл уй кириш қисмига ётиб олиб, можарони давом эттирган ҳолда уйни тарк этмаслигини билдирган.

Вазиятга ижарачининг отаси ҳам аралашган, оқибатда аёлнинг онаси енгил тан жароҳати олган. Мазкур ҳолат юзасидан уч нафар аёлга нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органи ходимининг қонуний талабларини бажармаслик) бўйича маъмурий баённома расмийлаштирилган.

Ижарачига нисбатан 183-модда (майда безорилик), унинг отасига нисбатан эса 52-модда (енгил тан жароҳати етказиш) бўйича ҳужжатлар расмийлаштирилган. Тўпланган материаллар Мирзо Улуғбек туман жиноят ишлари бўйича судига юборилган. Бироқ аниқланишича, мазкур фуқаролар бир неча бор чақирилганига қарамай, судга келмаган.