10 сентябрдан “Тошкент–Андижон–Тошкент” йўналишида замонавий CРРC-Далиан тезюрар электропоезд қатнови бошланди. Янги поезд 730/729-сонли амалдаги поезд таркиби ўрнига йўлга қўйилди. У Тошкентдан Андижонга 4 соат 15 дақиқада етиб боради.

Бироқ янги қатновнинг қулайлик ва тезлик билан бирга эътиборни тортаётган яна бир жиҳати бор.

Тарқалаётган маълумотларга кўра, янги поездда тарифлар йўналишга қараб белгиланган. Тошкентдан Попга бориш 195 090 сўм, Қўқонга 213 180 сўм, Марғилонга 249 840 сўм, Андижонгача эса 268 190 сўм этиб кўрсатилган.

Айни шу нарх йўловчилар орасида саволларни келтириб чиқармоқда. Чунки Андижон–Тошкент йўналишида мунтазам қатнайдиган аввалги поездларда чипта нархи айрим маълумотларга кўра 150–169 минг сўм атрофида бўлган. Янги поездда эса нарх 268 190 сўмга етгани айтилмоқда.

Янги электропоезд замонавий ва тезюрар бўлиб, унинг максимал тезлиги соатига 160 километргача етиши қайд этилган. Поездда йўловчилар учун замонавий қулайликлар яратилган. Шунингдек, у Тошкентдан Андижонга бориш учун 4 соат 15 дақиқа вақт сарфлайди.

Шу билан бирга, муҳим жиҳат шундаки, бу қўшимча қатнов эмас. Янги CРРC-Далиан электропоезди аввал ҳаракатланган 730/729-сонли поезд таркиби ўрнига қўйилган.

Шу сабабли йўловчиларда табиий савол пайдо бўлади: тезлик ва қулайлик ошгани билан, тарифнинг қарийб 270 минг сўмга етиши аҳоли учун қай даражада мақбул?

Янги 730-сонли поезд Тошкентдан ҳар куни соат 09:20 да жўнайди ва Ангрен, Поп, Қўқон ҳамда Марғилонда тўхтаб, 13:35 да Андижонга етиб боради.

Қайтишдаги 729-сонли поезд эса Андижондан 15:38 да йўлга чиқиб, 19:53 да Тошкентга етиб келади. Поезд таркиби 4 та эконом класс вагонидан иборат бўлиб, жами 357 та ўринга мўлжалланган.

Демак, янги қатнов Фарғона водийси билан пойтахт ўртасидаги ҳаракатни тезлаштириши ва йўловчиларга замонавий шароит яратиши билан аҳамиятли.

Аммо масаланинг иккинчи томони ҳам бор: 268 190 сўмлик чипта нархи ҳар куни ушбу йўналишдан фойдаланадиган оддий йўловчи учун қанчалик қулай?

Транспорт хизматининг аҳоли учун оммабоплиги, аввало, нарх ва сифат ўртасидаги мутаносибликка ҳам боғлиқ. Шу боис янги электропоезд йўловчиларга вақт тежамкорлиги бергани каби, унинг 268 минг сўмлик тарифи бўйича жамоатчиликдаги саволларга ҳам аниқ тушунтириш берилиши муҳим.