Тўрақўрғон туманида фаолият юритувчи тадбиркор-фермер Шерзод Пўлатов ўзи ҳақида эълон қилинган танқидий мақолалар юзасидан муносабат билдирди. Унинг айтишича, мақолалардаги маълумотлар бир томонлама берилаётгани хўжалик фаолиятига салбий таъсир қилмоқда.

Пўлатовнинг таъкидлашича, хўжаликда 50 нафардан ортиқ ишчи меҳнат қилади. Фермер танқидий чиқишлар “буюртма асосида” тайёрланаётганини иддао қилиб, айрим ҳолатлар тушунтиришсиз ёритилаётганини билдирди.

У биринчи мақолада кўл ўртасидаги симёғоч масаласи кўтарилганини айтди. Фермерга кўра, кўл тегишли қарор асосида ташкил этилган, таъмирлаш ишлари давомида хавфсизлик чоралари кўрилган ва ҳолат бартараф этилган.

Иккинчи мақолада пахта ерига полиз экилгани айтилган. Пўлатов эса мазкур ер экин майдони ҳисобланиши, бу йил алмашлаб экиш мақсадида пахта ва ғалладан ташқари озуқа экинига режалаштирилганини маълум қилди.

Фермернинг қўшимча қилишича, хўжалик “Драйд индерс” МЧЖдан 67 гектар сабзавот ерини ижарага олган ва режадан ташқари 50 гектар майдонга пахта эккан. Шунингдек, “Наманган пахта текс” МЧЖ билан 707 тонна пахта сотиш бўйича форвард шартномаси тузилган. Ҳозирда жами 160 гектар пахта парвариш қилинмоқда.

Шерзод Пўлатов камчиликлар бўлса, уларни тушунтириш ва бартараф этишга тайёрлигини билдирди. У ОАВ ва жамоатчиликдан ҳолатни бир томонлама ёритмасликни, хўжалик фаолиятига ортиқча босим ўтказмасликни сўради.