Ўзбекистон технологик металлар комбинати (ТМК) Хитойнинг йирик саноат корпорацияларидан бири, дунё тоғ-кон ва металлургия соҳасида катта тажрибага эга Shaanxi Non-ferrous Metals Holding Group билан ҳамкорлик меморандумини имзолади.

Маълум қилинишича, меморандум геология-қидирув ишларини ривожлантириш, критик минералларни қазиб олиш ва чуқур қайта ишлаш, илғор технологияларни жорий этиш, илмий-тадқиқот фаолиятини кенгайтириш, мутахассислар тайёрлаш ҳамда истиқболли инвестиция лойиҳаларини амалга оширишни назарда тутади.

Shaanxi Non-ferrous Metals Holding Group молибден, титан, рангли металлар, геология, инжиниринг ва тўлиқ саноат занжири бўйича жаҳон миқёсида етакчи корпорациялардан бири ҳисобланади. Холдинг таркибида 30 дан ортиқ корхона ва ташкилот фаолият юритади. Уларда 40 мингдан зиёд мутахассис иш олиб боради.

Корпорация геологик қидирувдан тортиб конларни ўзлаштириш, қазиб олиш, бойитиш, металлургик қайта ишлаш, илмий тадқиқотлар, инжиниринг ва юқори қўшилган қийматли маҳсулотлар ишлаб чиқаришгача бўлган йўналишларни қамраб олган интеграциялашган саноат тизимига эга.

Холдинг таркибидаги Jinduicheng Molybdenum компанияси дунёдаги йирик молибден ишлаб чиқарувчилардан бири саналади. Шунингдек, Shaanxi Non-ferrous Metals Holding Group таркибига аэрокосмик саноат учун титан ва титан қотишмаларини ишлаб чиқарувчи Baoti Group ҳам киради. Ушбу компания титан саноатининг глобал етакчиларидан бири сифатида танилган.

Ҳамкорлик нима учун муҳим?

ТМК ва Shaanxi Non-ferrous Metals Holding Group ўртасидаги келишув Ўзбекистон учун фақат навбатдаги саноат меморандуми эмас. У мамлакатнинг критик минераллар бозоридаги ўрнини мустаҳкамлашга қаратилган муҳим қадам сифатида баҳоланиши мумкин.

Бугунги глобал иқтисодиётда молибден, титан, вольфрам, литий, графит, мис ва бошқа технологик металларга талаб ортиб бормоқда. Бу хомашёлар электротехника, қайта тикланувчи энергетика, аэрокосмик саноат, мудофаа, автомобилсозлик ва юқори технологияли ишлаб чиқариш тармоқлари учун стратегик аҳамиятга эга.

Ўзбекистонда бундай ресурслар бўйича салоҳият мавжуд. Аммо соҳадаги асосий вазифа фақат қазиб олиш ҳажмини ошириш эмас, балки хомашёни чуқур қайта ишлаш, технология трансферини таъминлаш ва юқори қўшилган қийматли маҳсулотлар ишлаб чиқаришни йўлга қўйишдир. Янги меморандум айнан шу йўналишларга урғу бергани билан аҳамиятли.

Хитой корпорациясининг тўлиқ саноат занжирига эга экани ҳамкорликнинг амалий самарасини ошириши мумкин. Геология-қидирув, конларни ўзлаштириш, металлургик қайта ишлаш ва тайёр маҳсулот ишлаб чиқариш жараёнларини ягона тизимда ташкил этиш Ўзбекистонда технологик металлар саноатини янги босқичга олиб чиқиш имконини беради.

Яна бир муҳим жиҳат, меморандум мутахассислар тайёрлаш ва илмий-тадқиқот фаолиятини кенгайтиришни ҳам қамраб олади. Бу эса соҳада маҳаллий кадрлар салоҳиятини ошириш, замонавий инжиниринг ёндашувларини жорий этиш ва миллий саноат компетенцияларини шакллантириш учун муҳим омил ҳисобланади.

Умуман, ТМК ва Shaanxi Non-ferrous Metals Holding Group ўртасидаги ҳамкорлик Ўзбекистоннинг критик минераллар занжирида фаолроқ иштирок этишига хизмат қилиши мумкин.

Агар келишув амалий лойиҳалар, инвестициялар ва технология трансфери билан мустаҳкамланса, бу мамлакатда юқори технологияли металлургияни ривожлантириш, экспорт салоҳиятини ошириш ва саноатни диверсификация қилиш учун янги имкониятлар очади.