Британиянинг The Telegraph нашрига кўра, Кремль россияликларни эҳтимолий “урушдан кейинги давр”га аста-секин тайёрлай бошлаган. Аммо Владимир Путин ҳалигача Украинадаги урушни қандай шартлар асосида тугатиш бўйича аниқ стратегияга эга эмас.

Нашрнинг ёзишича, Кремлга яқин доираларда “урушдан кейинги Россия” мавзуси тобора кўпроқ муҳокама қилинмоқда. Айрим расмийлар ва пропагандачилар жамиятни якуний сценарийларга руҳан тайёрлашга уринаётгани айтилмоқда. Бироқ бу жараённинг ўзи Кремлда ягона ва мустаҳкам режа борлигини англатмайди.

The Telegraph таҳлилига кўра, Россия ҳукумати бир вақтнинг ўзида икки қарама-қарши вазифани ҳал қилишга уринмоқда: бир томондан, аҳолига “уруш ғалаба билан тугади” деган тасаввурни сингдириш, иккинчи томондан эса фронтдаги ва иқтисодиётдаги муаммоларни назоратда ушлаб туриш.

Нашрнинг қайд этишича, Кремль учун энг катта муаммолардан бири – жамиятда уруш чарчоғининг кучайиб бораётганидир. Россияда интернет чекловлари, иқтисодий босим, инфляция ва фронтдан келаётган йўқотишлар фонида норозилик кайфияти ўсиб бормоқда.

Шу билан бирга, Путин сўнгги чиқишларида уруш “якунига яқинлашаётгани” ҳақида гапирган бўлса-да, Кремль расмийлари ҳозирча тинчлик келишувининг конкрет параметрлари мавжуд эмаслигини тан олмоқда.

The Telegraph таҳлилида айтилишича, Кремлда ҳозирча “мағлубиятсиз якун” формуласи устида бош қотирилмоқда. Яъни Россия жамиятига уруш расман тўхтатилган тақдирда ҳам буни сиёсий ва ахборот нуқтаи назаридан “ютуқ” сифатида сотиш механизми ишлаб чиқилмоқда. Аммо фронтдаги вазият ва халқаро босим Кремлнинг ҳаракат майдонини чеклаётир.