The Economist журнали янги сонида Хитой Америка иштирокидаги урушни диққат билан кузатаётгани ва Вашингтоннинг стратегик хатоларидан геосиёсий фойда чиқаришга уринaётганини ёзди. Нашр муқовасига чиқарилган асосий ғоя шундай ифодаланган: “Душманинг хатога йўл қўяётган пайтда уни тўхтатма.”

Журнал талқинига кўра, АҚШ олиб бораётган ҳарбий ҳаракатлар рақибларини заифлаштириш ва Американинг қудратини намойиш этишни мўлжаллаган бўлиши мумкин. Бироқ Пекин бу вазиятни бошқача баҳоламоқда. Хитой раҳбарияти фикрича, агар Вашингтон узоқ ва қимматга тушадиган можарога чуқурроқ ботса, бу АҚШнинг сиёсий, иқтисодий ва дипломатик имкониятларини чеклаб қўйиши мумкин.

The Economist ёзишича, Хитой бу жараёнда очиқ тўқнашувдан кўра сабр билан кузатиб туриш тактикасини афзал кўрмоқда. Яъни Пекиннинг ҳисоб-китобига кўра, Америка ресурс сарфлаб, халқаро майдонда босим остида қолар экан, Хитой ўз позициясини кучайтириш учун янги имкониятларга эга бўлади.

Шу билан бирга, журнал Хитой бу урушдан фақат манфаат кўряпти, деган содда хулосага бормайди. Чунки узоқ давом этадиган можаро жаҳон бозорида беқарорликни кучайтириши, нефть нархларини кескин ўзгартириши ва халқаро савдога салбий таъсир кўрсатиши мумкин. Бу эса Хитой учун ҳам хатар демакдир.

Нашрнинг асосий хулосаси шундан иборатки, глобал рақобат доим ҳам фронт чизиғида ҳал бўлмайди. Баъзан энг катта ютуқни урушга бевосита шўнғимаган, балки рақибининг хатоларини совуққонлик билан кузатиб турган томон қўлга киритиши мумкин.