Тайванлик пластик жарроҳ, уч фарзанднинг отаси доктор Чен Вейнонг рафиқаси учун “совға” сифатида ўзида вазэктомия операциясини ўтказди. У жараённинг ҳар бир босқичини видеога олиб, интернетга жойлади. Видео қисқа вақт ичида 4 миллион марта кўрилган.

Вазэктомия – эркакларда фарзанд кўришни олдини олиш мақсадида уруғ йўлларини кесиш ёки боғлаш орқали амалга ошириладиган жарроҳлик амалиётидир. У одатда хавфсиз ва қисқа вақтда бажариладиган процедура ҳисобланади.

Доктор Ченнинг айтишича, у операцияни тўғри бажаришда бошқалардан кўра ўзига кўпроқ ишонган. У ўзига маҳаллий оғриқсизлантирувчи укол қилган, уруғ йўлини топган, уни кесиб, боғлаган ва сўнгра тиккан.

Одатда бундай амалиёт 15 дақиқа давом этади. Аммо Чен ўзига операция қилгани учун жараён бир соатга чўзилган.

Операция вақтида унинг рафиқаси ҳам хонада бўлган. У ҳам лицензияга эга жарроҳ ҳисобланади. Шунингдек, жараённи уролог назорат қилган, хонада яна уч нафар шифокор ва бир ҳамшира иштирок этган.

Жарроҳнинг айтишича, операциядан кейинги тун оғир ўтган, аммо эрталаб у ўзини яхши ҳис қилган ва ишга қайтган.

Тайпэй соғлиқни сақлаш департаменти ҳолатни ўрганиб, қонун бузилмаганини маълум қилган. Расмийлар бундай ҳолат бутунлай мисли кўрилмаган эмаслигини, айрим эркак шифокорлар ўзларига шундай амалиёт ўтказиши учраб туришини қайд этган.

Шундан сўнг доктор Чен жамоатчиликка мурожаат қилиб, уй шароитида вазэктомия қилиш ўта хавфли эканини таъкидлаган ва бундай амалиёт учун албатта мутахассис урологга мурожаат қилиш кераклигини айтган.