Сунъий интеллектнинг жадал ривожланиши дунё меҳнат бозорида катта ўзгаришларга сабаб бўлиши мумкин. Халқаро валюта жамғармаси (ХВЖ) ҳисоб-китобларига кўра, келгусида жаҳондаги иш ўринларининг қарийб 40 фоизи сунъий интеллект таъсирига дуч келади.

Бу ҳақда ХВЖ раҳбари Кристалина Георгиева 12 октябрь куни Бангкокда бўлиб ўтган халқаро йиғилишда маълум қилди.

Унинг таъкидлашича, сунъий интеллект айрим касбларда инсон меҳнатини енгиллаштирса, бошқаларида иш ўринларининг қисқариши ёки бутунлай йўқолишига олиб келиши мумкин. Георгиева ушбу жараённи секин ҳаракатланаётган, аммо катта таъсир кучига эга «цунами»га қиёслади.

Айни пайтда Microsoft, Amazon ва бошқа йирик компанияларда сунъий интеллект технологияларига сармоялар ортиши фонида ходимлар сонини қисқартириш жараёнлари кузатилмоқда.

Мутахассисларнинг фикрича, келгусида сунъий интеллектдан фойдаланиш кўникмалари меҳнат бозорида муҳим устунликлардан бирига айланади.

Шу билан бирга, ХВЖ сунъий интеллект иқтисодий ўсишни тезлаштириши ва янги иш имкониятларини яратиши мумкинлигини ҳам таъкидламоқда.