Қўрғонтеппа тумани Султонобод қишлоғи аҳолиси яшаш пункти яқинидаги чиқиндихона бўйича қилган мурожаатидан кейин ҳам ҳолат ўзгармаганини билдирмоқда.

Аҳолининг айтишича, 28 март куни Элтузарда нашр қилинган мурожаатдан сўнг ҳудудга чиқиндихонани кўмиш учун техника юборилган. Бироқ техника суратга олинганидан кейин тахминан 15 дақиқа ўтиб, ортига қайтиб кетган.

Чиқиндихона кўмилар экан, деб хурсанд бўлган эдик. Афсуски, техника бир чўмич тупроқ ҳам тўкмасдан кетди. Чиқинди эса қандай бўлса, шундайлигича қолмоқда, –  дейди мурожаатчи. – Туман ҳокимлигига мурожат қилсак, хўжакўрсинга кўмишга техника олиб келиб, расмга тушириб олиб кетди, холос. Қўрғонтепа туман ҳокимига қишлоҳимиз аҳолиси соғлиги керак эмас.

Аҳоли мазкур ҳолат инсон саломатлигига хавф туғдириши мумкинлигини таъкидлаб, муаммо тезроқ ўрганилишини сўрамоқда. Уларнинг фикрича, чиқиндихона аҳоли яшаш пунктига яқин жойда эмас, бошқа хавфсиз ҳудудга кўчирилиши керак.

Мурожаатда вилоят ва республика миқёсидаги СЭОМ, Экология вазирлиги ҳамда масъул ташкилотлар вакиллари ҳудудга келиб, ҳолатни жойида ўрганиши сўралган.

“Биз ҳеч кимни айблаш учун эмас, қишлоғимиз аҳолиси ва фарзандларимиз саломатлигини сақлаб қолиш учун мурожаат қиляпмиз”, дейилади мурожаатда.