Бухоро вилояти Шофиркон туманидан Элтузарга йўлланган мурожаатда айрим маҳаллий Кенгаш депутатларининг фуқаролар қабули ва сайловчилар билан ишлашга оид ҳисоботлари ҳаққонийлиги савол остига олинган. Мурожаат муаллифлари депутатлар фаолияти ўрганилиши ва ҳисоботлардаги маълумотлар текширилишини сўрамоқда.

Уларнинг иддаосича, депутатлардан бири фуқарони қабул қилгани ҳақида маълумот берган, бироқ мурожаат муаллифлари қабулда қатнашгани кўрсатилган шахсни аниқлай олмаган. Улар, шунингдек, айрим аҳоли ўз ҳудудидан сайланган депутатни танимаслигини айтмоқда.

Мурожаатда депутатларнинг исмлари, баҳсли ҳисоботлар ёки қабулда қатнашгани айтилган фуқаронинг маълумотлари келтирилмаган. Аммо унда:

«Аҳолининг 80 фоизидан кўпроғи депутатини танимайди»

дея таъкидланган.

Мурожаат муаллифлари Шофиркон тумани депутатларининг фуқаролар билан учрашувлари, қабуллари ва мурожаатларга муносабати текширилишини сўраган. Туман Кенгашининг расмий саҳифаси мавжуд; расмий манбаларда Кенгаш сессияларида аҳоли мурожаатлари ва маҳаллий маблағларни тақсимлаш масалалари кўрилгани қайд этилган холос.