Қуйидаги қарордан кейин Шофирконда электр ҳам ҳайратда: “Мен шунча йил ток бериб юрибман, лекин бундай ижодкорликни биринчи кўришим”, деди у симларини титратиб.

Маълум бўлишича, пахта тозалаш заводи директори Ш.Л. электр ҳисоблагичга “ижодий ёндашув” қилиб, умумий тармоққа ўзбошимчалик билан уланиб олган. Расмий тилда бу “қоидабузарлик” дейилади. Оддий тилда эса: “Ҳисоблагичга ҳам ишонч қолмади”, дегани.

Энг қизиғи, бу иш оддий фуқаро эмас, пахта заводи директори томонидан қилинган. Яъни мамлакатда энергия тежаш ҳақида йиғинлар ўтказиб, кейин кечқурун симларга “дўстона муносабат” билдирган раҳбарлар қатори яна битта ном қўшилди.

Судда директор айбини тан олган. Пушаймон бўлган. Бошқа такрорламаслигини айтган. Албатта, электр ҳам унга қараб: “Майли ака, бу сафар кечирдим”, деб турган бўлса керак.

Суд эса инсонпарварлик қилди. Қонун бўйича каттароқ жарима бериш мумкин эди, лекин “пушаймон бўлибди” деган сабаб билан жарима миқдори минимал даражадан ҳам пастроқ белгиланди.  2 миллион 60 минг сўм жарима.

Энергетика соҳаси мутасаддилари эса янги шиор устида бош қотирмоқда:
“Токни тежанг. Айниқса, раҳбарлардан асранг.”