Андижон вилояти Шаҳрихон туманидаги «Ёшлар кичик саноат зонаси»да фаолият юритаётган 38 нафар тадбиркор Қурилиш инспекциясининг маъмурий босими сабаб ўз ишини давом эттиришда мантиқ кўрмаяпти.

Тадбиркорларнинг Элтузарга маълум қилишича, улар 2021 йилда маҳаллий ҳокимлик ташаббуси билан ташкил этилган кичик саноат зонасига жалб қилинган, қурилиш ишларини тез фурсатда якунлаб ва ишлаб чиқаришни йўлга қўйиш бўйича кўрсатмалар асосида фаолият бошлашган. Улар ишга ўз маблағларини тиккан, кредитлар олган, ишлаб чиқариш қувватларини ишга туширган ва янги иш ўринлари яратишган.

Бироқ сўнгги беш йил давомида ер участкаларини расмийлаштириш бўйича қилинган мурожаатларга расмий идоралар парво қилмади. Тадбиркорларга ер қишлоқ хўжалиги тоифасида экани важ қилинди ва шу сабабдан объектларни ҳужжатлаштириш имкони бўлмади. Энди эса шу қурилишлар ноқонуний деб баҳоланиб, ишлари ривожланиб қолган тадбиркорларни бинолардан сиқиб чиқаришга қаратилган босимлар авж олди.

2026 йил 8 июль куни суд Қурилиш инспекцияси томонидан қўлланган жаримани бекор қилиб, ишни қайта кўриб чиқиш учун инспекцияга қайтарди. Аммо орадан 22 кун ўтиб, 30 июль куни инспекция яна жарима расмийлаштирди.

Суд қарори чиққандан кейин яна жарима қўлланилиши қандай ҳуқуқий асосга эга? Қурилиш инспекцияси суднинг кўрсатмаларини тушундими ўзи?

Масъул идоралар 2021 йилдан буёнги барча жараёнларни комплекс ўрганиш, 8 июлдаги суд қарори ҳамда 30 июлдаги Қурилиш инспекцияси қарори қонунийлигига ҳуқуқий баҳо бериш, маҳаллий ҳокимликнинг ўша пайтдаги ташаббуслари ва кўрсатмаларини ҳам текшириш зарур.

Ер муносабатларини расмийлаштириш, лойиҳаларни тасдиқлаш ва қурилишларни қонунийлаштириш бўйича аниқ ҳуқуқий ечим ишлаб чиқиш шарт.

Ёш тадбиркорлар Андижон вилояти ҳокимлиги, Шаҳрихон туман ҳокимлиги маъмурий дастак кутишмоқда.