Элтузар таҳририятига Самарқанд шаҳридан икки нафар вояга етмаган, ногиронлиги бўлган фарзандини ёлғиз тарбиялаётган аёл мурожаат қилди. У ўз иши бўйича суд ҳужжатлари кейинчалик ўзгартирилган бўлиши мумкинлигини даъво қилиб, буни тасдиқловчи сифатида ИИВ тизимидан олинган икки хил расмий маълумотномани кўрсатмоқда.

Мурожаат муаллифининг айтишича, 2023 йил 24 май куни Жиноят ишлари бўйича Самарқанд шаҳар судида судья Ж. Раупов унга нисбатан «1 йил ахлоқ тузатиш ишлари» жазосини эълон қилган.

Аёлнинг даъвосига кўра, суд мажлисида мазкур жазо ўқилганига гувоҳлар ҳам бор.

Бироқ кейинчалик унга тақдим этилган суд ҳужжатларида жазо тури 9 миллион сўм жарима сифатида кўрсатилган.

Мурожаатчи бу ўзгаришни унинг ўша пайтда уч ёшга тўлмаган ногирон фарзанди бўлгани ва дастлаб эълон қилинган жазони қўллаш билан боғлиқ ҳуқуқий муаммо юзага келгани билан изоҳламоқда.

Энг асосий савол эса ИИВ Тезкор-маълумотлар бошқармасидан олинган икки маълумотнома билан боғлиқ.

Мурожаатга кўра, 2025 йил 20 майда берилган расмий маълумотномада унга тайинланган жазо «1 йил ахлоқ тузатиш ишлари» деб қайд этилган.

Орадан бир ойдан сал кўпроқ вақт ўтиб, 2025 йил 25 июнда олинган бошқа маълумотномада эса мазкур маълумот ўзгариб, жазо 9 миллион сўм жарима сифатида кўрсатилган.

Мурожаатчи айнан шу икки ҳужжатдаги фарқни иш бўйича маълумотлар кейинчалик ўзгартирилганининг асосий рақамли далили, деб ҳисобламоқда.

Унинг фикрича, агар икки маълумотнома ҳақиқий бўлса, ваколатли органлар маълумот қачон, ким томонидан ва қандай асосда ўзгартирилганини текшириши керак.

Мурожаатда ушбу ҳолат юзасидан Жиноят кодексининг 209-моддаси — мансаб сохтакорлигига ҳам ишора қилинган. Бироқ мазкур модданинг ушбу ҳолатга татбиқ этилиши ёки жиноят аломатлари мавжудлигини фақат ваколатли органлар текшируви ва қонуний қарор орқали аниқлаш мумкин.

Аёлнинг маълум қилишича, Бош прокуратура унинг мурожаатини текшириш учун Самарқанд вилояти судига юборган.

Бироқ у 2026 йил 11 сентябрда Самарқанд вилояти судлари судьялари малака ҳайъати раиси И. Карабаев имзоси билан №318225-r/26-сонли қарор олганини айтмоқда.

Мурожаатчига кўра, қарорда унинг мурожаати «ҳуқуқий маълумот бериш орқали ҳал қилинди» деб кўрсатилган.

Аёл эса асосий важи – ИИВдан олинган икки маълумотномадаги зиддият текширилмаганини таъкидламоқда.

Унинг талабича, текширувда камида қуйидаги саволларга жавоб берилиши керак: 2023 йил 24 май куни судда айнан қандай жазо эълон қилинган, дастлабки ҳукм матнида қандай жазо қайд этилган, ИИВ базасига биринчи бўлиб қандай маълумот киритилган ва 2025 йил май–июнь ойлари оралиғида ушбу маълумот кимнинг қарори ёки топшириғи билан ўзгартирилган?

Мурожаат муаллифи маҳаллий адвокатлар суд тизими вакилларидан чўчиб, уни ҳимоя қилишдан бош тортаётганини ҳам иддао қилмоқда.

Элтузар мурожаатда келтирилган даъволарни мустақил равишда тасдиқлагани йўқ. Масала юзасидан суд органлари, прокуратура ва ИИВнинг расмий муносабати ушбу зиддиятларга ойдинлик киритиши мумкин.