“Ассалому алайкум, Элтузар жамоаси! Мен 2025 йил 10 июнда Самарқанд туман прокуратурасига коррупция ва ҳужжатларни сохталаштириш орқали талабаликка қабул қилинаётганлар ҳақида аниқ фактлар билан мурожаат қилдим. Суриштирув ўтказилгани айтилди, аммо натижа чиқмади. Орадан тўрт ой ўтиб, порталдан олган жавобим эса кулгили: гўёки октябрь ойида университетдан сўроқ учун одам топилмаган эмиш.

Шундан сўнг вилоят ҳокимлигига, Президент администрациясига, омбудсманга, Олий таълим, фан ва инновациялар вазирлигига мурожаат қилдим. Аммо деярли барча идоралар туман прокуратурасининг аввалги жавобининг санасини ўзгартириб, яна менга қайтариш билан чекланди. Яъни, мурожаатлар айланиб яна ўзимизнинг амалдорларга қайтиб келди.

Участка нозири мендан “ҳеч кимга даъвом йўқ” деган мазмунда тилхат олди ва шу асосда ҳокимиятга қилиган мурожаатим ёпилди. Менинг розилигимсиз, босим остида олинган тилхат қанчалик қонуний?

2026 йил январ ойида яна аниқ далиллар билан прокуратурага қайта мурожаат қилдим. Орадан икки ҳафта ўтиб, университетдан қўнғироқ қилишди: “Нега ёздингиз, келишгандик-ку”, деган мазмунда дўқ-пўписа қилишди. Кейин эса терговчи қўнғироқ қилиб, яна мурожаат юборсам, “туҳмат” учун жавобгарлик борлигини эслатди.

Шундан бери жимлик. Расмий жавоб йўқ. Қонун қаерда қолди? Мурожаатларга белгиланган муддатларда жавоб бериш тартиби қаерга йўқолди?

Элтузар, биз шундай тизимда яшаяпмизки, унда фуқаро ҳақиқатни айтса, айбдорга айланиб қолмоқда. Мурожаат қилсангиз, сизни тинч қўйишмайди, босим ўтказишади, ҳатто қўрқитишади. Бу ҳолатлардан кейин оддий одам қандай қилиб адолатга ишонади?”