Россия Давлат думаси депутати ва собиқ генерал Андрей Гурулёв ўз Telegram каналида фронтдаги вазият ҳақида шундай таҳлил эълон қилдики, у Кремлнинг ғалабапараст баёнотларига зид келибгина қолмай, амалда стратегик босиқлик ва чиқиш йўли йўқлигини тан олди. Албатта, баёнот шов-шувга сабаб бўлиши ортидан генерал ТГ ҳисоби “бузиб кирилгани”ни даъво қилиб орқага чекинди.

Гурулёвнинг ёзишича, уруш «ўта қаттиқ позицион босиқлик» босқичига кирган. Илгарилаш километрлар эмас, метрлар ва ўрмон ҳимоя тасмалари билан ўлчанмоқда. Бунинг учун эса жуда катта қурбонлар бериляпти. Унинг таъкидлашича, Россия қўшинлари фронт ва фронт ортида ҳаракатни деярли тўхтатиб қўйган «дронлар девори»га дуч келган. Ҳарбий техника кўп ҳолларда паноҳгоҳдан чиқиши биланёқ нишонга айланмоқда.

Собиқ генералнинг фикрича, Россия ҳарбий машинасининг асосий муаммоси қарор қабул қилиш тезлигида намоён бўлмоқда. Бюрократик тизим келишувлар ва юқори раҳбарият учун «чиройли ҳисоботлар» тайёрлаш билан банд экан, Украина технологик устунликни тобора оширмоқда. Гурулёвнинг энг баҳсли иддаоси эса вазиятни янги оммавий сафарбарликсиз ўзгартириш мумкин эмаслиги ва бундай қарор кузга режалаштирилгани ҳақидаги гап бўлди.

Бу баёнот Россия расмий пропагандаси чизадиган барқарорлик манзараси билан ҳарбий элита ичидаги хавотирлар ўртасидаги зиддиятни яна бир бор кўрсатди. Кузатувчилар фикрича, бундай чиқишлар музокаралар ёки можарони музлатиш ғояларига қарши турган «қирғийлар» қаноти учун қўл келиши мумкин.

Энг катта савол эса очиқ қолмоқда: бу чиқиш Россияда янги сафарбарлик ва қаттиқроқ сиёсатнинг хабарчисими ёки ҳокимият тизими ҳаммасига «аккаунт бузилган» деган баҳона билан нуқта қўйишни афзал кўрадими?