Мана, 4 йилдирки, украинлар ўз мустақиллиги ва тупроқ бутунлигини ҳимоя қилиб, ўрис босқинчиларига қарши курашмоқда. Уларнинг бу кураши кўп нарсага аниқлик киритди.

Олтиннинг ҳақиқий олтин ëки оддий ялтироқ тунука эканлиги махсус кислота ëрдамида аниқланади. Украина, худди шу кислота каби, ким олтину ким тунука эканлигини фош қилди.

Украинлар ўз мустақиллигини ҳимоя қиларкан, “мустақиллик олий неъмат” дея 30 йилки минбарларда оғиз йиртган ўзбек раҳбариятининг аслида мустақиллик душмани ва путинқул эканини аниқ фош қилди.

Аснода миллионлаб ўзбекларнинг ич-ичидан чириб, Кремл пропагандаси тарафидан зомби путинқулга айлантирилгани ҳам фош бўлди. Украина, буюк демистификатор каби, мустақиллик ва эркинлик душмани бўлганлар юзига ойна тутди.

Украина тутган кўзгуда “дунëнинг иккинчи кучли армияси” дея эртак тўқилган Россия армияси ва давлати одамларниинг кир мошинасини ўмариб қочишдан бошқага ярамайдиган криминал тўда экани аëн бўлди. Тахта туалетларда умри ўтган қашшоқ солдатлар эски танкдан тушиб, унитаз ўмараëтиб Украина тупроғида ўғитга айланди.

Айнан Украина боис йиллар давомида Германия каби кучли давлат Путинни парваришлаб келгани аëн бўлди. Шрўдер каби канслернинг путинпараст бўлиб чиққани немислар юз қорасидир.

Британияда кўпчилик севмайдиган ва пахмоқ сочига тароқ тегмагани учун кулги қилинадиган Борис Жонсон эса худди шарафли Черчилл каби “уришда туриш йўқ” дейдиган ботир эканлигини кўрсатди. Европанинг Макрон каби заиф декоратив қаратқилари фонида Жонсоннинг Украинани қўллагани ярқ этиб кўринди.

Энг муҳими эса Украина ўзига ўзи кўзгу тутди. Горилка ичиб, салага мурч сепиб еб, кўзига кўринган нарсани ўмарадиган коррупционер ўлароқ кўринган украинлар, аслида, ўз ватанини севадиган¸ керак бўлса, ватани учун жонини берадиган ботир эканлиги ўртага чиқди.

Ўрис танкистини асирга олиб, танкани тракторига судраб келаëтган украин фермери мустақиллик фақат майдонда рақсга тушиб, ҳезим артистларнинг қўлини бир-бир сиқиб чиқиш эмаслигини яққол кўрсатди.

Эринмаган ўзбек тикувчи хотин “клоун” деб масхара қиладиган Зеленский эса ватан учун кураш ишғолчи қўлидан ўрден олиб кўксига тақишдан иборат эмаслигини кўрсатди.

Эй замондош, сен Украина кўзгусида ўз аксингга боқ.

Кимсан? Нимасан? Ватанни севишни Украиндан ўрган.